Ի տես երկրին դիմագրաւած տնտեսական եւ ընկերային ահռելի պայմաններուն, նախարարաց խորհուրդի տնտեսական եւ ելեւմտական հարցերու նախարարական յանձնախումբը երէկ գումարեց նիստ մը` նախագահութեամբ վարչապետ Նեժիպ Միքաթիի:
Նիստէն ետք Միքաթի յայտնեց, որ 1 նոյեմբերէն սկսեալ պետական մարզի պաշտօնէութեան յաւելեալ կէս ամսական պիտի տրամադրուի` իբրեւ ընկերային օժանդակութիւն:
Վարչապետը յայտնեց, որ նախքան տօնական օրերը կատարուելիք այս վճարումները պէտք չէ ըլլան նուազ քան մէկուկէս միլիոն լ. ոսկի, եւ ոչ աւելի քան` երեք միլիոն լ. ոսկի: Ան աւելցուց նաեւ, որ պաշտօնեաներուն պէտք է օրական 64 հազար լ. ոսկի վճարուի` իբրեւ փոխադրածախս:
«Այս որոշումները կը վերաբերին պետական մարզի բոլոր պաշտօնեաներուն», ըսաւ ան:
Վարչապետ Միքաթի հաստատեց, որ պետական մարզի պաշտօնեաները պէտք է 66 առ հարիւր համեմատութեամբ ներկայութիւն ըլլան իրենց հաստատութիւններուն եւ վարչութիւններուն մէջ:
Ան ընդգծեց, որ դեղորայքին նպաստը շարունակելու համար պէտք է նիւթական աղբիւրներ ապահովել եւ լիբանանեան դեղորայք արտադրելու ճարտարարուեստին զօրակցիլ, մինչեւ որ կարելի ըլլայ վերատեսութեան ենթարկել 2022-ի պետական ամավարկը, որուն մշակումը մօտիկ ապագային պիտի աւարտի:
Միւս կողմէ, Միքաթի վարչապետարանին մէջ ընդունեց արտաքին գործոց եւ արտերկրի լիբանանցիներու հարցերու նախարար Ապտալլա Պու Հապիպը, որուն հետ քննարկեց շաբաթ, 20 նոյեմբեր 2021-ին Ռուսիա կատարելիք անոր այցելութեան մանրամասնութիւնները:
Միքաթի հանդիպում մը ունեցաւ նաեւ Ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմի հետ:
Նշենք, որ կարգ մը տեղեկատուական աղբիւրներ հաղորդեցին, որ վարչապետ Միքաթի այսօր պիտի այցելէ հանրապետութեան նախագահ զօր. Միշել Աունին` քննարկելու համար կառավարութիւնը իր նիստերուն վերադարձնելու կարելիութիւնները: