ՓԼՈՎՏԻՒ (Պուլկարիա).- 27 Փետրուարին, Պուլկարիոյ Փլովտիւ քաղաքին մէջ տեղի ունեցաւ անդրանիկ ցուցադրութիւնը «13 Սնտուկներու Յիշողութիւնը» վաւերագրական շարժապատկերին, որ նկարահանուեցաւ Հայկական մշակութային եւ տեղեկատուական կեդրոնին աջակցութեամբ: Առաջին ցուցադրութեան ներկայ եղան Փլովտիւի մօտ Հայաստանի պատուաւոր հիւպատոս Եղիազար Ուզունեան, համայնքի անդամներ եւ բազմաթիւ հիւրեր:
«Շարժապատկերը կը պատմէ այն հայերուն մասին, որոնք Ցեղասպանութենէն ետք կրցան ողջ մնալ եւ Մարմարա ծովուն ափի իրենց ծննդավայրը ձգելով՝ 1922ին հաստատուեցան Պուլկարիա: Անոնք Ռոտոսթօ քաղաքէն իրենց հետ բերին ոչ թէ իրենց անձնական իրերն ու հարստութիւնը, այլ կրցան մոռացումէն ու ոչնչացումէն փրկել եկեղեցական սրբութիւնները: Ռոտոսթօ քաղաքի Սուրբ Թագաւոր եկեղեցւոյ մէջ պահուող իրենց նախնիներու պատրաստած ամենագեղեցիկ եւ ամենաթանկ սրբութիւնները կրցան տանիլ 13 սունտուկներով, որոնք այսօր կը պահպանուին քաղաքի Սուրբ Գէորգ եկեղեցւոյ թանգարանին մէջ», «Հայերն Այսօր»ի հետ զրոյցին ըսաւ Փլովտիւի մօտ Հայաստանի պատուաւոր հիւպատոսի մշակութային հարցերով խորհրդական Աղաւնի Գէորգեան, որ աւելցուց, թէ Պուլկարիոյ մէջ բնակութիւն հաստատած իրենց նախնիներու պատմութիւնն է՝ Հայոց Ցեղասպանութեան,100 եւ աւելի տարիներ երկարող ցաւին մասին:
«Շարժապատկերի նկարահանումներուն մասնակցած մարդիկ սիրով համաձայնեցան իրենց սիրտերը բանալու եւ պատմելու մեր պատմութեան դէպքերը փաստող էջ մը, իրադարձութիւններ, զորս մենք կը կարենանք փոխանցել մեր նոր սերունդներուն», նշեց Աղաւնի Գէորգեան:
Շարժապատկերը պիտի ցուցադրուի Պուլկարիոյ զանազան քաղաքներու հայկական համայնքներուն մէջ:
«Ասիկա Փլովտիւի հայկական համայնքի պատրաստած 3րդ շարժապատկերն է: 2016 Մայիսին Պուլկարիոյ հանրային պատկերասփիւռի կայանին ցուցադրուած ֆիլմին ընթացքին մենք պատմած ենք համայնքի երաժիշտներուն, դերասաններուն եւ արուեստագէտներուն մասին, որոնցմով մենք շատ կը հպարտանանք: Երկրորդ շարժապատկերը հայկական աւանդական ուտելիքներու մասին էր: Հայոց Ցեղասպանութեան 102ամեակին նուիրուած շարժապատկերը՝ «13 Սնտուկներու Յիշողութիւնը», կը նուիրենք մեր համայնքին եւ մեր ազգին», նշեց Աղաւնի Գէորգեան: