Այսօր, Ուրբաթ, 14 Սեպտեմբեր 2012-ին, առաւօտեան ժամը 9:00-ին սկսաւ Հայ Կաթողիկէ Մեսրոպեան բարձրագոյն վարժարանի 2012-2013 տարեշրջանի ուսուցիչներու ընդհանուր ժողովը:
Ներկաները մէկ վայրկեան յոտնկայս յարգեցին վարժարանի հոգեւոր հովիւ Հայր Վարդան եպս.Աշգարեանի եւ մանկապարտէզի վաստակաշատ ուսուցչուհի տիկին Էլիզ Սէօքիւնեան–Վարդանեանի յիշատակը, որմէ ետք խօսք առաւ Մեսրոպեան վարժարանի տնօրէն պրն. Կրէկուար Գալուստ, որ առաջին հերթին ներկայացուց Մեսրոպեանի մեծ ընտանիքին միացած նոր անդամներուն անունները եւ պաշտօնները` անոնց մաղթելով յաջողութիւն:
Անցնող տարեշրջանին գործունէութիւնը արժեւորելէ ետք, պրն.տնօրէնը շեշտեց, որ յառաջիկայ տարեշրջանին պիտի շարունակուի Սէն Ժոզէֆ համալսարանի հետ կրթական գործակցութիւնը, որուն հիմքը ուսուցիչներու վերաւորակաւորումն է եւ կրթական ծրագիրի պատշաճեցումը արդի կրթական չափորոշիչներուն: Պրն. Կրէկուար Գալուստ հաստատեց, որ Մեսրոպեան վարժարանը ունի հոգեւոր եւ ազգային առաքելութիւն, որ հայ դպրոցի էութեան հիմքն է, եւ որուն համար պէտք է օգտագործել բոլոր կարելիութիւններն ու միջոցները:
Պրն. Գալուստ յայտնեց, որ հաւաքական ճիգերով, գործակցութեան ոգիով, նուիրումով, կազմակերպուածութեամբ, բծախնդրութեամբ, հետեւողա–կանութեամբ, պատկանելիութեան գիտակցութեամբ եւ ճշդապահութեամբ կ՛իրականացուին նպատակները, որոնց իրագործման մէջ անձնակազմի իւրաքանչիւր անհատ ունի իր պարտականութիւնն ու դերակատարութիւնը:
Լիբանանի պետական քննութիւններու արդիւնքները առարկայական տուեալներով ներկայացնելէ ետք, Մեսրոպեան վարժարանի տնօրէնը յոյս յատնեց, որ 75-ամեակի սեմին դպրոցը կը յաղթահարէ առկայ դժուարութիւնները եւ կ՛արձանագրէ մեսրոպեանավայել նոր, արդի, կրթական, հոգեւոր եւ ազգային նուաճումներ:
Մեսրոպեան վարժարանի տնօրէնին խօսքին յաջորդեց մանկապարտէզի, նախակրթարանի եւ միջնակարգի ու երկրորդականի բաժանմունքներու ժողովները:
ՀԱՅ ԿԱԹՈՂԻԿԷ ՄԵՍՐՈՊԵԱՆ ԲԱՐՁՐԱԳՈՅՆ ՎԱՐԺԱՐԱՆԻ
ՏԵՍՉԱԿԱՆ ԳՐԱՍԵՆԵԱԿ