Մինսքի Խումբի Նպատակն է «Կենդանացնել» Հայ-Ատրպէյճանական Բանակցութիւնները. Փասգալ Մոնյէ

0
175

 Ֆրանսան բազմիցս յայտարարած է եւ կը շարունակէ յայտարարել` Լեռնային Ղարաբաղի հակամարտութեան ռազմական լուծման ճանապարհ գոյութիւն չունի: Այս մասին` ըստ Armenpress.am-ի` յայտարարած է Ատրպէյճանի մօտ Ֆրանսայի արտակարգ եւ լիազօր դեսպան Փասգալ Մոնյէ: «Հակամարտութեան կողմերը պէտք է իրենց վրայ վերցնեն խնդրի խաղաղ լուծման պարտավարութիւն` հիմք ընդունելով Հելսինքեան եզրափակիչ ակտը, այսինքն` ուժի կիրառման անթոյլատրելիութիւնը, ազգերու ինքնորոշման իրաւունքը եւ տարածքային ամբողջականութիւնը»,- ըսած է Մոնյէ:

Դեսպանը նշած է նաեւ, որ Ֆրանսան` իբրեւ ԵԱՀԿ Մինսքի խումբի համանախագահ, իր ակտիւ ներդրումը կը ցուցաբերէ հակամարտութեան կողմերուն նոր մտքեր եւ գաղափարներ ներկայացնելու գործին, որոնցմէ են` մարդասիրական երկխօսութիւնը, հրադադարի խախտման դէպքերը քննելու մեքենականութեան ստեղծումը, պատմական եւ մշակութային կոթողներու պահպանման վերաբերեալ առաջարկները:

Ֆրանսացի դիւանագէտին ներկայացմամբ` Ֆրանսուա Օլանտի իշխանութեան գալէն ետք իրենք նախարարներու մակարդակով ունեցած են երեք հանդիպում, որոնց երկուքը տեղի ունեցած են Փարիզի մէջ: Մոնյէի տեղեկացմամբ` ներկայիս կը նախապատրաստուի չորրորդ հանդիպումը: «Այսինքն` մենք Մինսքի խումբի միւս համանախագահներուն հետ նպատակ ունունք կրկին կենդանացնելու երկխօսութիւնը Հայաստանի եւ Ատրպէյճանի միջեւ»,- ըսած է դիւանագէտը:

Պատասխանելով Մինսքի խումբին մէջ Ֆրանսային` Եւրոմիութեամբ փոխարինելու վերաբերեալ հարցին` Մոնյէ նշած է,- «Համանախագահական ձեւաչափը ինծի համար որեւէ կերպ խնդրահարոյց չէ, անոր ապացոյցներէն մէկը այն է, որ մինչ այժմ անիկա թոյլ չէ տուած ռազմական նոր սրացում, եւ անհրաժեշտ է հաշուի առնել այդ կարեւոր փաստը: Ընդունուած Մատրիտեան սկզբունքները մշակուած են այդ ծիրէն ներս: Ատոր համար ալ խօսիլ այն մասին, որ Մինսքի խումբի համանախագահութիւնը բանակցութիւններու յառաջխաղացման հարցով որեւէ արդիւնքի չէ հասած, սխալ է: Ատիկա կը խօսի իրավիճակի վաղ մոռացութեան մասին, որ ստեղծուած էր 1994-ին: Խնդրի կարգաւորման հարցով անհրաժեշտ է, առաջին հերթին, խուսափիլ ողբերգութենէն, մարդկային կորուստներէն եւ փախստականներէն: Խնդրի կարգաւորումը եւ հնարաւոր պատերազմի կանխումը հնարաւոր պիտի ըլլայ հզօր կամքի ցուցաբերմամբ»,- ըսած է դեսպանը:

Մինսի խումբի ռուս համանախագահ Իկոր Փոփովը յայտարարած էր, որ կը նախապատրաստուի Հայաստանի եւ Ատրպէյճանի ԱԳ նախարարներու հանդիպումը, որ, հաւանաբար, տեղի պիտի ունենայ այս շաբաթ` Փարիզի մէջ:

LEAVE A REPLY

Please enter your comment!
Please enter your name here