Երեւանեան «Պոպոք» Փառատօնին Պիտի Մասնակցին 15 Պետութիւններու Հեղինակաւոր Գովազդային Ընկերութիւններ

0
151

   Երեւանի քաղաքապետարանի եւ Հայաստանի գովազդային խորհուրդին նախաձեռնութեամբ` Հոկտեմբեր 25-27 Երեւանի մէջ պիտի իրականացուի «Պոպոք» գովազդի միջազգային 3-րդ փառատօնը: Այս մասին, ըստ Armenpress.am-ի, Հոկտեմբեր 23-ին լրագրողներու հետ հանդիպման ժամանակ նշած է Երեւանի քաղաքապետարանի արտաքին ձեւաւորման եւ գովազդի վարչութեան պետ Արազ Պաղտասարեան: Փառատօնը հնարաւորութիւն պիտի տայ ամփոփելու եւ գնահատելու անցած տարուան ընթացքին կատարուած աշխատանքները եւ խօսելու առկայ բացթողումներու եւ թերացումներու մասին: «Սա նաեւ լաւ հնարաւորութիւն է, որպէսզի տեղի եւ միջազգային մասնագէտները հնարաւորութիւն ունենան քննարկումներ ծաւալելու»,- ըսած է ան: Վարչութեան պետին խօսքով` արդէն կը նկատուի միտում, ըստ որուն` հայկական գովազդները կը սկսին համապատասխանել միջազգային չափանիշներուն, կը նկատուի ստեղծագործ մտածողութեան առկայութիւն

Փառատօնին ծիրէն ներս պիտի քննարկուին նաեւ Երեւան քաղաքի արտաքին ձեւաւորման հայեցակարգի մշակման ուղղուած հարցեր, ինչպէս նաեւ պիտի լրամշակուի գովազդային հայեցակարգը: Բացման արարողութենէն ետք տեղի պիտի ունենայ կլոր սեղան «Մեծ քաղաքներու գովազդ. Մեծ քաղաքներու մէջ գովազդ» թեմայով, որուն ընթացքին պիտի քննարկուին Երեւանի արտաքին տեսքի եւ մեր մայրաքաղաքը իբրեւ զբօսաշրջային կեդրոն ներկայացնելու հայեցակարգերուն վերաբերող հարցեր: Փառատօնի նախագահ Արմէն Մարտիրոսեան նշած է, որ «Պոպոք» գովազդի միջազգային փառատօնին հիմնական անուանակարգերուն` «Հեռուստա եւ տեսագովազդ», «Տպագիր եւ արտաքին գովազդ», «Թուային եւ նոր գովազդակիրներ», «Ռատիոգովազդ», «Մարքեթինկային արշաւ» եւ «Գրաֆիքական տիզայն», այս տարի աւելցած է «Գիրք» անուանակարգը, որ սահմանուած է Երեւանի` 2012-ի գիրքի համաշխարհային մայրաքաղաք հռչակուելուն առիթով: Անուանակարգի բացառիկութիւնը կը կայանայ այն բանի մէջ, որ մինչ օրս ոչ մէկ գովազդային փառատօնի ժամանակ նման անուանակարգ յայտարարուած չէ: «Ամենամեայ այս փառատօնին այս տարի կը մասնակցեն 15 պետութիւներից հեղինակաւոր ընկերութիւններ,  հիւրեր, կը լինի միջազգային ժիւրի: Փառատօնի շրջանակներում կանցկացուեն վարպետութեան դասեր»,- ըսած է ան:

Անդրադառնալով փառատօնի խորագիրին ընտրութեան` Արմէն Մարտիրոսեան նշած է, որ պոպոքը (ընկոյզ) բացուած վիճակի մէջ կը յիշեցնէ մարդու ուղեղ, ուր կը ծնին այն հետաքրքրական մտքերը, որոնք յետոյ կը վերածուին գովազդի

Երեւանի գլխաւոր designer Գագա Ամատունի եւս շեշտած է, որ փառատօնը լաւ առիթ է, որպէսզի designer-ները ու քաղաքի արտաքին տեսքով մտահոգ մարդիկ սկսին քննարկումներ իրականացնել: «Պոպոք» գովազդի միջազգային փառատօնին նպատակը` միջազգային եւ Հայաստանի գովազդային ընկերութիւններու միջեւ յարաբերութիւններու զարգացումն ու ամրապնդումն է, ինչպէս նաեւ հայաստանեան գովազդային շուկային մէջ գործող մասնագէտներու եւ ուսանողներու մակարդակին աճը:

LEAVE A REPLY

Please enter your comment!
Please enter your name here