Տեղեկատուական Ճարտարագիտութեան Հայաստանեան Վերջին Զարգացումները

0
156

Տեղեկատուական ճարտարագիտութիւններու ոլորտին մէջ ներկայիս կը գործեն 380 կազմակերպութիւններ, 2011 թուականի 281-ի համեմատ: Այդ մասին այսօր` Հոկտեմբեր 23-ին յայտարարեց Ձեռնարկութիւններու incubator հիմնադրամի տնօրէն Բագրատ Ենգիբարեան, ՀՀ Տեղեկատուական ճարտարագիտութիւններու զարգացման աջակցող խորհուրդի նիստին ներկայացնելով ՏՃ ոլորտի վերջին զարգացումները: Այս մասին կը հաղորդէ News.am կայքը:

Կը պահպանուին ՏՃ ոլորտի աճի բարձր չափերը` տարեկան 25%: Եթէ 2011 թուականին ոլորտի համախառն արտադրանքը 205 միլիոն տոլար էր, ապա 2012 թուականին կը գերազանցուի 250 միլիոն տոլարը: Բացի այդ` շուկայի մէջ ամրապնդուած են տեղական կազմակերպութիւնները, ամէնայնդէպս` տեղական եւ արտասահմանեան կազմակերպութիւններու կշիռները արդէն հաւասարած են:

ՏՃ ոլորտի արտադրանքի մօտ 60%-ը կ’արտահանուի, արտահանման մեծ մասը բաժին կ’իյնայ ԱՄՆ-ին: Հայկական ՏՃ ընկերութիւնները որոշ չափով աշխուժացած են եւրոպական շուկայի մէջ, սակայն ռուսական շուկայի մասնաբաժինը դեռ մեծ չէ:

Բաւական հետաքրքրական զարգացումներ կան աշխատուժի շուկային մէջ: Եթէ 2011-ին ոլորտի մասնագէտներուն թիւը 6860 էր, ապա 2012-ին անոնց թիւը կը գերազանցէ 7800-ը` ապահովելով 15%-ի աճ: Եթէ 3-4 տարի առաջ ոլորտին մօտաւորապէս 70%-ը կ’աշխատէր արտասահմանեան կազմակերպութիւններու մէջ, ապա ներկայիս տեղական եւ արտասահմանեան կազմակերպութիւններու միջեւ յարաբերակցութիւնը 50/50 է: ՏՃ ընկերութիւններու աշխատակիցներուն մօտաւորապէս 70 %-ը տեքնիքական հարցերով մասնագէտներ են: Եթէ աւելցնենք հեռահաղորդակցութեան ոլորտը, ապա ոլորտի աշխատակիցներուն թիւը կը գերազանցէ 10 հազարը:

ՏՃ ոլորտին մէջ Հայաստանը աչքի կ’իյնայ կանանց բարձր մասնակցութեամբ: Զարգացած երկիրներու մէջ կանանց ներգրաւուածութիւնը ՏՃ ոլորտին մէջ 10%-ը չի գերազանցեր, իսկ Հայաստանի մէջ ան կը գերազանցէ 30%-ը, որ բացառիկ երեւոյթ է ամբողջ աշխարհի մէջ: Ըստ Բ. Ենգիբարեանի` նոյնիսկ արտասահմանեան փորձագէտները զարմանքով կը նշեն ատոր մասին:

Բ. Ենգիբարեանի ներկայացումով` աշխարհի մէջ «դաժան մրցակցութիւն» կ’ընթանայ ՏՃ ոլորտին մէջ, որուն կը միջամտեն նաեւ կառավարութիւնները: Հայաստանը ունի շարք մը համեմատական առաւելութիւններ: Առաջին` Հայաստանը դեռ կ’օգտուի խորհրդային ժամանակներուն ստեղծուած կրթական ենթակառուցուածքներէն: Ատոր հիման վրայ Հայաստանը ստեղծած է իր ամենամեծ առաւելութիւնը` մասնագիտական ներուժը: «Հայաստանը աժան աշխատուժ չունի, Հայաստանում աշխատավարձերը բաւականաչափ բարձր են: Սակայն այն հատուածում, որտեղ Հայաստանը մրցակցում է` հետազօտական, նորարարական ծրագրեր, Հայաստանը շատ հետաքրքիր դիրքաւորւում է աշխարհում, եւ դեռ ունի աշխատավարձային համեմատական առաւելութիւն»,- ըսաւ Բ. Ենգիբարեան:

LEAVE A REPLY

Please enter your comment!
Please enter your name here