ԵԱՀԿ Անհանգիստ է Լեռնային Ղարաբաղի Հակամարտութեան Մէջ Իրավիճակի Վատթարացմամբ

0
170

 ԵԱՀԿ լրջօրէն մտահոգուած է Լեռնային Ղարաբաղի հակամարտութեան մէջ իրավիճակի վատթարացմամբ: Interfax-ին յայտնած է ԵԱՀԿ գլխաւոր քարտուղար Լամպերդօ Զանիեր: Անոր խօսքով, ձգձգուած հակամարտութիւններու լուծման հարցով յառաջընթացի հասնիլը իռլանտական նախագահութեան, եւ ընդհանրապէս ԵԱՀԿ-ի առաջնահերթութիւններէն է:

Միաժամանակ, եթէ Մերձտնեսդրի հակամարտութեան կարգաւորման հարցով արձանագրուած է որոշ յառաջընթաց` ԼՂ հակամարտութեան շուրջ իրավիճակը լաւատեսութիւն չի ներշնչեր միջազգային միջնորդներու մօտ:

“Ինչ կը վերաբերի Լեռնային Ղարաբաղին, բոլորը անհանգստացած են յառաջընթացի բացակայութեամբ եւ շրջաններու մէջ իրավիճակի վատթարացմամբ. միայն այս տարի սպանուած է 28 մարդ: Ես անձամբ կը կիսեմ այդ անհանգստութիւնը»,- ընդգծած է Զանիեր: Ան նշած է, որ ԵԱՀԿ-ը կը շարունակէ աջակցիլ Մինսքի խումբին եւ անոր համանախագահներու` Ռուսաստանի, Ֆրանսայի եւ ԱՄՆ-ի ջանքերուն:

“Սակայն ոչ մէկ միջազգային ջանք չի կրնար գործուն ըլլալ, եթէ երկու կողմերը չունին քաղաքական կամք` բանակցութիւններու ճանապարհով խաղաղ համաձայնութեան հասնելու համար: Ես այս մասին ընդգծած եմ Նիւ Եորքի մէջ երկու երկիրներու ԱԳ նախարարներուն հետ վերջերս ունեցած իմ հանդիպումներուն ժամանակ: Ապագային միտուած կողմնորոշումը միակ միջոցն է լարուածութիւնը կանխելու եւ տարածաշրջանի երկար սպասուած անվտանգութիւնը ապահովելու համար”,- նշած է ԵԱՀԿ գլխաւոր քարտուղարը:

Անդրադառնալով Վրաստանին, Զանիեր յիշեցուցած է, որ ԵԱՀԿ-ը ԵՄ-ի ու ՄԱԿ-ի հետ միասին կը համանախագահէ Ժընեւի միջազգային բանավէճերուն, որոնք սկսած են 2008-ի ռուս-վրացական Օգոստոսեան հակամարտութենէն ետք: «Դատելով այս պահուն եղած յայտարարութիւններէն, ես վստահ եմ, որ Վրաստանի նոր կառավարութիւնը հաւատարիմ պիտի ըլլայ Ժընեւեան բանավէճերուն մասնակցելու դիրքորոշման` դրական եւ կառուցողական առումով»,- յայտարարած է Զանիեր:

 

LEAVE A REPLY

Please enter your comment!
Please enter your name here