Լիբանանեան Բանակը Իր Հակակշիռին Տակ Կ՛առնէ Կացութիւնը Պէյրութի Եւ Թրիփոլիի Մէջ

0
143

 Լիբանանի ներքին ապահովութեան ուժերու գաղտնի սպասարկութեան պետ զօր. Ուիսամ Հասանի սպանութենէն ետք, Լիբանանի մէջ Կիրակի օր բռնկած զինեալ բախումները, որոնք ժամանակաւորապէս հանդարտած էին Երկուշաբթի օր, Երեքշաբթի, Հոկտեմբեր 23-ի առաւօտեան վերսկսան Թրիփոլիի մէջ, ուր բանակը դարձեալ պարտադրուեցաւ միջամտել՝ կացութիւնը իր հակակշիռին տակ առնելու համար: Երեքշաբթի օր հաղորդուեցաւ, թէ չորս զոհեր եւս արձանագրուած են Թրիփոլիի մէջ՝ այդտեղ սպաննուածներուն թիւը 10-ի հասցնելով:
Պաշտպանութեան նախարար Ֆայէզ Ղոսըն շեշտեց, որ լիբանանեան բանակը ամբողջ Լիբանանի ապահովութեան կը հսկէ, եւ կոչ ուղղեց լիբանանեան պետական հաստատութիւններուն ընդդիմացող քաղաքացիներուն, որ վերջ տան իրենց որդեգրած ապօրինի քայլերուն: «Ի՞նչ կը պատահէր նախանցեալ գիշեր, եթէ բանակը չըլլար», հարց տուաւ Ղոսըն: Պաշտպանութեան նախարարը աւելցուց, որ բանակին մօտ կը գտնուին մայրաքաղաքին մէջ խռովարարութեանց դիմած բոլոր յանցագործներուն անունները:
Միւս կողմէ՝ բանակը հրապարակեց հաղորդագրութիւն մը, որուն մէջ հաստատեց, թէ բանակը խիստ կերպով պիտի հակադարձէ երկիրի ապահովութիւնը խախտողներուն: Բանակի հրամանատարութիւնը կոչ ուղղեց լիբանանցի քաղաքական պատասխանատուներուն զգոյշ ըլլալու իրենց կատարած յայտարարութիւններուն եւ կեցուածքներուն մէջ ու գրգռութիւններ չհրահրելու, որովհետեւ այդ յայտարարութիւնները կրնան սպառնալ Լիբանանի ճակատագիրին:
Քաղաքական գետնի վրայ, Լիբանանի նախագահ զօր. Միշել Սըլէյման Երեքշաբթի օր հանդիպում մը ունեցաւ նախկին վարչապետ Ֆուատ Սինիորայի հետ, որ Հասանի սպանութեան պատասխանատուն կը նկատէ Լիբանանի կառավարութիւնը:
Հանդիպումէն ետք, Սինիորա յայտարարեց, թէ ընդդիմադիր «Մուսթաքպալ» պլոքը որոշած է ազգային երկխօսութեան ոչ մէկ նիստի մասնակցիլ:

Նախագահը եւ վարչապետ Նեժիպ Միքաթի նոյն օրը հանդիպումներ ունեցան Եւրոմիութեան արտաքին քաղաքականութեան բարձրագոյն յանձնակատար Քաթրին Աշթընի հետ, որմէ ետք Էշթըն կոչ ըրաւ ամէն ջանք ի գործ դնելու՝ Լիբանանի կայունութիւնն ու ազգային միասնականութիւնը պահպանելու:
Յայտնենք, թէ վարչապետը, որ Երկուշաբթի օր սպառնացած էր հրաժարիլ, նախագահ Սըլէյմանի հետ հանդիպելէ ետք յայտարարեց, որ պիտի չհրաժարի, այլ պիտի շարունակէ իր աշխատանքը՝ պահպանելու համար երկիրին կայունութիւնը:
Նաեւ, խորհրդարանի նախագահ Նեպիհ Պըրրի Երկուշաբթի օր հանդիպում մը ունեցաւ Լիբանանի մօտ Միացեալ Նահանգներու դեսպան Մորա Գոնելիի հետ եւ քննարկեց լիբանանեան ու շրջանային վերջին իրադարձութիւնները: Նոյն օրը, ներքին ապահովութեան ուժերու ընդհանուր տնօրէն զօր. Աշրաֆ Ռիֆի յայտնեց, որ Լիբանան պիտի ժամանէ ամերիկեան դաշնակցային գաղտնի սպասարկութեան՝ «Էֆ.Պի.Այ.»ի, մէկ պատուիրակութիւնը, որ պիտի օժանդակէ զօրավար Հասանի սպանութեան հետաքննութեան:

LEAVE A REPLY

Please enter your comment!
Please enter your name here