Լիբանանի Հայաշատ Շրջաններուն Մէջ Իրավիճակը Հանդարտ Է. Շահան Գանտահարեան

0
132

Լիբանանի մէջ իրավիճակն այժմ աւելի հանգիստ է, երկիրը աւելի ապահով վիճակի մէջ է: Այս մասին «Արմենփրես»-ին տեղեկացուցած է Պէյրութի «Ազդակ»  օրաթերթի գլխաւոր խմբագիր Շահան Գանտահարեան` աւելցնելով, որ  հայաշատ շրջաններուն մէջ կեանքը կ’ընթանայ բնականոն հունով, եւ միջադէպեր չեն արձանագրուած:

Գանտահարեան տեղեկացուցած է նաեւ, որ Լիբանանի կառավարութեան շէնքը կը գտնուի խիստ հսկողութեան տակ, այնուհանդերձ, մերձակայքին երբեմն-երբեմն կը հնչեն կառավարութեան հրաժարականին վերաբերեալ կոչեր:

Արաբական լրատուամիջոցները կը տեղեկացնեն, որ Լիբանանի հիւսիսային Թրիփոլի քաղաքին մէջ իրավիճակը այժմ հանգիստ է: Լիբանանեան բանակը կը հսկէ Պապ ալ Թապաննէ եւ Ճապալ Մուհսէն թաղամասերը, ուր բախումներ տեղի ունեցած էին: Քանի մը օրուան ընթացքին տեղի ունեցած բախումներու հետեւանքով երկու շրջաններուն մէջ զոհուած էր 11 եւ վիրաւորուած 39 մարդ:

Մայրաքաղաքի արեւմտեան շրջանները արդէն սկսած են բնականոն կեանքով ապրիլ, զինուորականները քանի մը օր է կը հսկեն յատկապէս Կասկան եւ Շաթիլա շրջանները, ուր բնակիչներու մեծամասնութիւնը սուննի է:

Պէյրութի քրիստոնէական Աշրաֆիէ թաղամասին մէջ քանի մը օր առաջ տեղի ունեցած պայթումի հետեւանքով Լիբանանի մէջ իրավիճակը բաւական լարուած էր: Պայթումին հետեւանքով զոհուած Ներքին անվտանգութեան ուժերու տեղեկատուութեան վարչութեան տնօրէն Ուիսամ Հասանի յուղարկաւորութենէն ետք քաղաքացիներէն շատեր ուղեւորուած են դէպի կառավարութեան շէնք` պահանջելով վարչապետին հրաժարականը:

 

LEAVE A REPLY

Please enter your comment!
Please enter your name here