Հայաստանի Մէջ Նուազագոյն Աշխատավարձով Կ՛ապրի Շուրջ 50 Հազար Անձ

0
138

Հայաստանի մէջ 470 հազար վարձքով աշխատողներուն մօտ 10 տոկոսը ամսական 30-40 հազար դրամ աշխատավարձ կը ստանայ: Այդ մասին 23 Հոկտեմբերին Հայաստանի Ազգային ժողովին մէջ յայտնած է Հայաստանի ելեւմուտքի նախարար Վաչէ Գաբրիէլեան՝ ներկայացնելով նուազագոյն աշխատավարձը բարձրացնելու մասին օրինագիծը: Ըստ Վ. Գաբրիէլեանի, պետական մարզին մէջ նուազագոյն աշխատավարձ կամ անոր շատ մօտ գումար կը ստանան գրադարանավարուհիները, հաւաքարարները, իսկ սեփական հատուածին մէջ նման վարձատրութեամբ աշխատողներուն թիւը մեծ է։

Վ. Գաբրիէլեան նշեց, որ 35 հազար դրամ աշխատավարձը աշխատողը պէտք է ամբողջութեամբ ստանայ, այսինքն՝ գործատէրը պէտք է ծրագրաւորէ նուազագոյնը 46 հազար 296 դրամ: Ըստ Վ. Գաբրիէլեանի, նուազագոյն աշխատավարձը 2.5 հազար դրամով աւելցնելու պարագային գործատիրոջ ծախսը պիտի աւելնայ 5 հազար դրամով:
Նշենք, որ Հայաստանի կառավարութիւնը կ՛առաջարկէ ամսական նուազագոյն աշխատավարձը 32.5 հազար դրամի փոխարէն 2013-ի 1 Յունուարին ճշդել 35 հազար դրամ:

Իր այս դիրքորոշումով, կառավարութիւնը կը հակադրուի Ազգային ժողովի ՀՅԴ խմբակցութեան պատգամաւորներ Աղուան Վարդանեանի, Արմէն Ռուստամեանի, Արծուիկ Մինասեանի, Վահան Յովհաննիսեանի եւ Արմէն Բաբայեանի ներկայացուցած «Նուազագոյն ամսական աշխատավարձի մասին» ՀՀ օրէնքի նախագիծին, որ կ՛առաջարկէր 2013-ին նուազագոյն աշխատավարձը բարձրացնել 36, 2014-ին՝ 30, իսկ 2015-ին՝ 15 տոկոսով:

LEAVE A REPLY

Please enter your comment!
Please enter your name here