Սուրիահայերուն Համար Նոր Արտօնութիւննե՞ր

0
160

  Հայաստանի կառավարութիւնը կը շարունակէ ընդառաջել Սուրիոյ մէջ ստեղծուած ճգնաժամին պատճառով Հայաստան ժամանող սուրիահայերուն: 

 Գործադիրը առաջարկած է Ազգային ժողովին լրացում կատարել պետական տուրքի մասին օրէնքին մէջ` այդպիսով որոշ արտօնութիւններ տալով սուրիահայերուն: Կառավարութեան առաջարկած նախագիծը ընդգրկուած է խորհրդարանի քառօրեայի օրակարգ:

Փաստաթուղթը Երեքշաբթի օրը խորհրդարանականներուն ներկայացուց Սփիւռքի նախարար Հրանոյշ Յակոբեան:

Ըստ Նախարար Հ. Յակոբեանի՝ շուրջ 5 հազար հայրենակիցներ, որոնց մէկ մասը` մօտաւորապէս 60 տոկոսը, եկած էր Հայաստան 21 օրուան կամ երկու ամսուան ժամանակով, սակայն իրավիճակի բերումով անոնք կ’երկարաձգեն իրենց կեցութիւնը հայրենիքի մէջ: Այդ իսկ պատճառով առաջացած է խնդիր` վիզաներու երկարաձգման, կացութեան կարգավիճակի, կացութեան ժամանակաւոր կարգավիճակի հետ կապուած. ատիկա կը նշանակէ, որ անոնք պէտք է գոնէ քանի մը ամսուան համար առնուազն 150 հազար դրամ (մօտ 375 տոլար) մուծեն համապատասխան տուրք կամ տոյժ:

Սուրիահայերուն աջակցելու համար կառավարութիւնը նպատակայարմար կը գտնէ զանոնք ազատել բոլոր տոյժերէն եւ տուգանքներէն:

«Եւ որպէսզի միայն Սիրիայում չլինի, Աստուած մի արասցէ, մենք ձեւակերպումը տուեցինք, որ եթէ մարդու կեանքին եւ առողջութեանը տուեալ երկրում, որտեղ ինքը ապրում է, սպառնում է վտանգ, ապա ընդհանրական ներկայացնել օրէնքը, որպէսզի լինի ընդհանրապէս: Փաստօրէն, մօտաւորապէս պետութեանը 150 միլիոն դրամի, այսպէս ասած, չասեմ վնաս` յամենայն դէպս, պիւտճէ չի մուտքագրուելու, բայց կարծում ենք, որ անհրաժեշտութիւն է, եւ պէտք է մենք չգանձենք որեւէ գումար սիրիահայերից ստեղծուած իրավիճակում», – շարունակեց Հրանոյշ Յակոբեան:

Պատգամաւորներէն եւ ոչ մէկը որեւէ բացասական դիրքորոշում յայտնեց առաջարկուող նախագիծին վերաբերեալ, եւ, հաւանաբար, քուէարկութեան պարագային կառավարութեան առաջարկը կ’ընդունուի:

LEAVE A REPLY

Please enter your comment!
Please enter your name here