Սուրիա Յաջող կը նկատէ Իպրահիմիի Այցելութիւնը

0
136
Սուրիոյ արտաքին գործոց փոխնախարար Ֆայսալ Մըքտատ՝  Լախտար Իպրահիմիի այցելութեան ընթացքին յոյս յայտնեց, որ շուտով Ատհայի տօնին առիթով զինադադարի հաստատման շուրջ համաձայնութիւն գոյանայ` շեշտելով, որ «պէտք է այդ մէկը շուտով գոյացնենք»: Կը յայտնէ «ՌԻԱ նովոսթի»ն։

Ան ըսաւ, որ Իպրահիմիի «այցելութիւնը շատ տեղին ու յաջող էր, իսկ Իպրահիմիի հետ համագործակցութիւնը` անսահման»` աւելցնելով, որ «երկուքս ալ կը ջանանք Սուրիոյ, շրջանի եւ աշխարհի վրայ հանդարտութիւն, ապահովութիւն եւ կայունութիւն հաստատել, ուստի այդ պատճառով Իպրահիմի այս ջանքը կը թափէ` գործակցաբար առնչակից կողմերուն դադրեցնելու համար բռնարարքներն ու ահաբեկչութիւնը, իսկ մենք միշտ լաւատես ենք»:

Թուրքիոյ փոխվարչապետ Ալի Պապաճան յայտնեց, որ Թուրքիա Իպրահիմիի` Սուրիոյ մէջ Ատհայի տօնին առիթով զինադադար հաստատելու ջանքերուն կը զօրակցի` աւելցնելով, որ սուրիական ընդդիմութիւնը եւս այդ ջանքերուն կը զօրակցի:

Սուրիոյ արտաքին գործոց նախարարութիւնը յայտարարեց, որ «ֆրանսական նախկին եւ ներկայ կառավարութիւնները Սուրիոյ մէջ ահաբեկչական զինեալ աւազակախումբերուն տրամադրուած աջակցութեան միջոցով կը շարունակեն միջազգային օրէնքի բացայայտ մարտահրաւէր ուղղել»:

ՄԱԿ-ի ընդհանուր քարտուղարի խաղաղապահ գործողութիւններու հարցով տեղակալ Էվրէ Լատսուս երէկ յայտարարած է, որ ՄԱԿ կրնայ Սուրիա խաղաղապահներ ուղարկել, եթէ Ապահովութեան խորհուրդը այդպիսի որոշում մը որդեգրէ: «Մենք պատրաստ ենք գործելու, եթէ ատիկա անհրաժեշտ ըլլայ, եթէ այդպիսի լիազօրութիւն ստանանք», ըսած է Լատսուս:

Ան նշած է, որ պիտի քննարկուին տարբերակներ, թէ ի՛նչ «կարելի է ընել, որպէսզի ներդրում կատարուի անվտանգութեան ապահովման ծիրին մէջ կամ, կարելի է, քաղաքային անձերու պաշտպանութեան, սակայն տակաւին կանուխ է որեւէ տուեալներ տալու»:

LEAVE A REPLY

Please enter your comment!
Please enter your name here