Ֆրանսայի Մէջ Հայոց Ցեղասպանութեան Ժխտումը Քրէականացնող Նոր Օրինագիծը Պիտի Ներկայացուի Ապրիլ 24-էն Ընդառաջ

0
130

 Ֆրանսայի Ազգային Ժողովի սոցիալիստներու կուսակցութեան նախագահ Պրիւնօ Լէ Ռու` Ֆրանսայի մէջ Հայկական կազմակերպութիւններու համակարգող խորհուրդի (CCAF) պատուիրակութեան համանախագահներուն հետ հանդիպման ընթացքին` վերահաստատած է կուսակցութեան` Հայոց Ցեղասպանութեան ժխտումը քրէականացնող օրինագիծին ընդունման մտադրութիւնը: Այս մասին` ըստ Armenpress.am-ի`ըսած է Հայկական կազմակերպութիւններու համակարգող խորհուրդի համանախագահ Արա Թորանեան: «Լէ Ռուի կուսակցութիւնն էր, որ վեց տարի առաջ այս օրինագիծը ներկայացուցած է Խորհրդարանին, նոյն կուսակցութիւնն է, որ երկու տարի առաջ Ծերակոյտին առջեւ առաջարկեց նոյն օրինագիծը, հետեւաբար` կը սպասենք, որ անիկա պիտի շարունակէ իր բռնած ուղին»,- ըսաւ Թորանեան:

Խորհուրդի համանախագահին խօսքով` Լէ Ռու նշած է, որ ոչինչ փոխուած է, պարզապէս իրենք դեռ կարճ ժամանակ է, որ իշխանութեան եկած են եւ պէտք է սպասել` վստահեցնելով, որ իրենց սկզբունքներուն մէջ որեւէ բան չէ փոխուած: Ան ընդգծած է, որ Ֆրանսայի նախագահ Ֆրանսուա Օլանտ պէտք է յարգէ իր տուած խոստումը, եւ Հայոց Ցեղասպանութեան ժխտումը քրէականացնող նոր օրէնքի նախագիծ իրենք պէտք է առաջարկեն Ապրիլ 24-ին ընդառաջ: Հայաստանի եւ Ֆրանսայի նախագահներ Սերժ Սարգսեանի եւ Ֆրանսուա Օլանտի` Նոյեմբեր 12-ին կայանալիք հանդիպումը, Թորանեանի խօսքով, առիթ պիտի դառնայ, որ այս ամէնը դրուին աւելի պաշտօնական հիմքերու վրայ:

Փարիզի Հայ Դատի գրասենեակի ղեկավար Հրաչ Վարժապետեան, իր հերթին նշած է, որ երկու երկիրներու նախագահներու հանդիպման նախապատրաստական աշխատանքները արդէն ընթացքի մէջ են, Ելիսէյեան պալատի հետ արդէն կապ հաստատուած է, դեսպանատունն ալ աշխատանքներ կը տանի այդ ուղղութեամբ: Ֆրանսահայ համայնքը, իր հերթին, ամէն ինչ կ’ընէ նախագահը յաւուր պատշաճի ընդունելու համար: Անդրադառնալով հայ համայնքի եւ Օլանտի նախատեսուած հանդիպման` Վարժապետեան նշեց, որ դեռ ճշտուած չեն ժամկէտները. հանդիպումը կը ձգձգուի, այդ իսկ պատճառով դեռ ոչինչ կը յայտարարէ:

LEAVE A REPLY

Please enter your comment!
Please enter your name here