Մեքսիքայի Խորհրդարանը Կը Սատարէ Ժողովուրդներու Ինքնորոշման Իրաւունքին

0
133

Պաշտօնական այցելութեամբ Մեքսիքա գտնուող Հայաստանի արտաքին գործոց նախարար Էտուարտ Նալպանտեան հանդիպում ունեցած է Մեքսիքայի պատգամաւորներու տան առաջին նախագահի տեղակալ Ֆրանցիսքօ Արօյօ Վիերայի հետ:
Ֆ. Ա. Վիերա նշած է, որ Մեքսիքայի խորհրդարանը կ՛ուզէ  նպաստել հայ-մեքսիքական յարաբերութիւններու զարգացման եւ ամրապնդման:

Էտուարտ Նալպանտեան ընդգծած է, որ նախորդ խորհրդարանին մէջ ղարաբաղեան հիմնախնդիրին վերաբերեալ իրականութիւնը խեղաթիւրող յայտարարութիւնը վնաս հասցուցած է ոչ միայն երկկողմանի յարաբերութիւններուն, այլ նաեւ  մեծապէս կը հակասէ հիմնախնդիրի կարգաւորման վերաբերեալ միջազգային հանրութեան դիրքորոշման,  որ բազմիցս արտայայտուած է ԵԱՀԿ Մինսքի խումբի համանախագահ երկիրներու ղեկավարներուն կողմէ: Նախարարին բնորոշումով, նման քայլերը վնաս կը հասցնեն միջազգային հանրութեան կողմէ հիմնախնդրի հանգուցալուծման նպատակով ի գործ դրուող ջանքերուն, ինչպէս նաեւ կը վտանգեն տարածաշրջանային կայունութեան։
Մեքսիքայի խորհրդարանի բարձրաստիճան ներկայացուցիչը դիտել տուած է, որ տեղեակ է վերոյիշեալ յայտարարութեան բացասական հետեւանքներուն մասին. ան պարզաբանումներ տուած է այդ գծով եւ ընդգծած, որ Մեքսիքայի խորհրդարանը կը սատարէ ժողովուրդներու ինքնորոշման միջազգային իրաւունքի հիմնարար սկզբունքին եւ խորհրդարանին այլ դիրքորոշումներ վերագրելու փորձերը չեն համապատասխաներ իրականութեան:

Էտուարտ Նալպանտեան  գոհունակութիւն յայտնած է Մեքսիքայի խորհրդարանին կողմէ ինքնորոշման իրաւունքի սկզբունքին միանշանակ սատարելուն, ինչպէս նաեւ Մեքսիքայի արտաքին յարաբերութիւններու մարմիններէն ստացուած այն հաւաստիացումներուն, որ պաշտօնական Մեքսիքա կ՛աջակցի ԵԱՀԿ Մինսքի խումբի ղարաբաղեան հիմնահարցի հանգուցալուծման վերաբերեալ ներկայացուցած առաջարկներուն եւ այդ ուղղութեամբ ջանք կը թափէ։
Նախարար Նալպանտեան յոյս յայտնած է, որ Մեքսիքայի նորընտիր խորհրդարանը գործնական քայլերու ձեռնարկէ՝ Հայաստանի հետ յարաբերութիւններու զարգացման ուղղութեամբ:
Ֆրանցիսքօ Արօյօ Վիերա նշած է, որ խորհրդարանը եւս շուտով ձեռնամուխ պիտի ըլլայ Հայաստանի խորհրդարանին հետ բարեկամութեան խումբի ձեւաւորման, որ անկասկած փոխգործակցութեան կարեւոր ձեւաչափ պիտի ըլլայ:
Մեքսիքայի մէջ Հայաստանի արտաքին գործոց նախարարը նաեւ հանդիպում ունեցած է տեղւոյն հայ համայնքի ներկայացուցիչներուն հետ, որոնց ներկայացուցած է Հայաստանի արտաքին քաղաքականութեան գլխաւոր ուղղութիւնները, երկրին մէջ իրականացուող բարեփոխումները, ինչպէս նաեւ պատասխանած է իրեն ուղղուած հարցումներուն։
Հայաստանի արտաքին գործոց նախարարին տուած այցելութիւնը բաւական ընդարձակ կերպով անդրադարձ գտաւ տեղական լրատուամիջոցներուն կողմէ։ Մեքսիքայի մամուլը   բազմաթիւ հրապարակումներով անդրադարձաւ Ատրպէյճանի նախկին  նախագահի եւ այսպէս կոչուած Խօճալուի յուշարձաններու տեղադրումէն ետք ստեղծուած իրավիճակին՝ զայն որակելով հարուած մը Մեքսիքայի ժողովուրդին արժանապատուութեան:
Մեքսիքայի արտաքին գործոց նախարարութենէն Հայաստանի արտաքին գործոց նախարարութեան ղեկավարին տեղեկացուցած են, որ հանրային կարծիքի խիստ դժգոհութեան իբրեւ հետեւանք՝ Մեքսիքոյի քաղաքապետարանը որոշում տուած է ստեղծելու յատուկ յանձնաժողով մը՝ ատրպէյճանական յուշարձաններուն ճակատագիրը որոշելու նպատակով:
Աւարտելով Մեքսիքա այցելութիւնը՝ նախարար Նալպանտեան ուղղուեցաւ Կուաթեմալա:

LEAVE A REPLY

Please enter your comment!
Please enter your name here