Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԸՆԴՈՒՆԵՑ «ԱՊՐԵԼՈՒ ԻՐԱՒՈՒՆՔ» ՄԻՈՒԹԵԱՆ ՆԵՐԿԱՅԱՑՈՒՑԻՉՆԵՐԸ

0
155

ԱՆԹԻԼԻԱՍ – Հինգշաբթի 25 Հոկտեմբեր 2012-ի առաւօտուն, Վեհափառ Հայրապետը ընդունեց «Ապրելու Իրաւունքը» նոր միութեան ներկայացուցիչները: Միութեան նպատակն է զանազան միջոցներով ու ծրագիրներու մշակումով շեշտել կեանքի կարեւորութիւնը, մերժելով կեանքին սպառնացող բոլոր տեսակի երեւոյթները: Միութեան պատասխանատուները հոգեւոր պետերուն այցելութիւններ կը կատարեն ունենալու համար անոնց զօրակցութիւնը, որպէսզի կառավարութեան ներկայացնեն իրենց պահանջքը յատուկ օր մը հռչակելու «Ապրելու Իրաւունք» անունով:

            Վեհափառ Հայրապետը ողջունելով այս նախաձեռնութիւնը լայնօրէն անդրադարձաւ կեանքի հասկացողութեան, աստուածաբանական ու բարոյագիտական տեսանկիւններէ դիտուած: Ան ըսաւ, որ ընդհանուր գիծերով կեանքի նկատմամբ աշխարհի բոլոր կրօնները նոյն մօտեցումը ունին: Քրիստոնէութեան պարագային Վեհափառը յիշեցուց, որ աստուածաշնչական ուսուցումներու լոյսին տակ կեանքը աստուածատուր նուէր է, հետեւաբար, ոեւէ մեղանչում կեանքի դէմ մեղանչում է Աստուծոյ դէմ: Միաժամանակ Վեհափառը ըսաւ, թէ կեանքին պէտք է մօտենալ համապարփակ իմաստով, այլ խօսքով` կեանքը ունի իր բանական եւ ոչ-բանական երեսները, եւ մարդը պէտք է դիտել որպէս բանական գոյութիւն ստեղծագործութեան ու տիեզերքի շրջագիծէն ներս: Հետեւաբար, ապրելու իրւունքը միայն մարդուն առնչուած մտահոգութիւն պէտք չէ ըլլայ, այլ նաեւ կենսոլորտին ու կենսոլորտին կապուած բոլոր գոյութիւններուն:

 Այս առիթով Վեհափառ Հայրապետը նաեւ շեշտեց, որ կեանքին առնչուած հիմնական արժէքները` արդարութիւն, խաղաղութիւն, ազատութիւն, սոսկ մարդկային իրաւանց սկզբունքներ չեն, այլ կեանքի նկատմամբ քրիստոնէական ուսուցումներուն հիմքը կը կազմեն: Վեհափառ Հայրապետը թելադրեց, որ այս հարցերուն գծով անհրաժեշտ է թէ՛ ակադեմական մակարդակի վրայ սեմինարներ ու դասախօսութիւններ կազմակերպել եւ թէ աւելի պարզ մօտեցումով ժողովուրդին փոխանցել անհրաժեշտ տեղեկութիւններ:

 

LEAVE A REPLY

Please enter your comment!
Please enter your name here