ԵԿԵՂԵՑԱԿԱՆ ԸՆՏԱՆԻՔՆԵՐՈՒ ՔԱՐՏՈՒՂԱՐՆԵՐՈՒ ՏԱՐԵԿԱՆ ԺՈՂՈՎ

0
134

Միջեկեղեցական կեանք

 

 

ՆԱՐԵԿ ԱՐՔ. ԱԼԵԷՄԷԶԵԱՆ ԸՆՏՐՈՒԵՑԱՒ ԱՏԵՆԱՊԵՏ ՆՈՅՆ ՄԱՐՄՆԻՆ

 

ԱՆԹԻԼԻԱՍ – 23-25 Հոկտեմբեր 2012, Ժնեւի Եկեղեցիներու Համաշխարհային Խորհուրդի կեդրոնատեղիին մէջ, գումարուեցաւ Եկեղեցական Ընտանիքներու Քարտուղարներու տարեկան ժողովը, որուն Մեծի Տանն Կիլիկիոյ Կաթողիկոսութեան կողմէ մասնակցեցաւ անդամ Գերշ. Տ. Նարեկ Արք. Ալեէմէզեան (Վարիչ Միջեկեղեցական Յարաբերութիւններու եւ Տեսուչ Դպրեվանքի):

Ժողովականներ յաջորդ շրջանին համար Նարեկ Սրբազանը միաձայնութեամբ իրենց ատենապետը ընտրեցին:

Ժողովին միւս մասնակիցներն էին Ուղղափառ, Հռոմէական Կաթոլիկ, Բողոքական, Անկլիքան, Լուտերական, Բարեկարգեալ, Մկրտչական, Մեթոտիսթ, Գալստական եւ Ազատ Եկեղեցիներու գլխաւոր ընտանիքներէ աւելի քան քսան հինգ ներկայացուցիչներ:

ժողովականներ քննարկեցին միջ-եկեղեցական եւ ներ-եկեղեցական յարաբերութիւններուն առնչուած հիմնական հարցեր եւ համաքրիստոնէական մտահոգութիւններ:

Իր զեկոյցին մէջ, Նարեկ Սրբազան ներկայացուց Արեւելեան Ուղղափառ Եկեղեցիներու այլ Եկեղեցական Ընտանիքներու հետ ունեցած աստուածաբանական պաշտօնական երկխօսութիւնները եւ Մեծի Տանն Կիլիկիոյ Կաթողիկոսութեան միջ-եկեղեցական ու միջ-կրօնական յարաբերութիւններուն գլխաւոր երեսները: Ան նաեւ յատուկ կերպով ընդգծեց, թէ հակառակ քրիստոնեաներուն Միջին Արեւելքէն ներս դիմագրաւած բազմաթիւ դժուարութիւններուն, հրամայական է անոնց ներկայութիւնն ու վկայութիւնը շրջանէն ներս եւ բոլոր Եկեղեցիները այս ուղղութեամբ առաւել գործօն դերակատարութիւն պէտք է ունենան:

Առաւել, Նարեկ Սրբազան առանձին հանդիպումներ ունեցաւ Եկեղեցիներու Համաշխարհային Խորհուրդի Ընդհանուր Քարտուղար Դոկտ. Օլաւ Ֆիքսէ Թուէյթի եւ զանազան բաժանմունքներու պատասխանատուներուն հետ եւ քննարկեց միջ-եկեղեցական շարժումն ու Եկեղեցիներու Համաշխարհային Խորհուրդը շահագրգռող հարցեր:

Սրբազանը հանդիպեցաւ Հռոմէական Կաթոլիկ Եկեղեցւոյ Քրիստոնէական Միութեան Բաժանմունքի Ընդհանուր Քարտուղար Պրայըն Ֆերըլ Եպիսկոպոսին հետ եւ Ն.Ս. Պենետիկտոս ԺԶ. Պապին Լիբանան այցելութեան արժեւորումը կատարեց:

Սրբազանը աշխատանքային հանդիպում ունեցաւ Մեծի Տանն Կիլիկիոյ Կաթողիկոսութեան Միջ-եկեղեցական Յարաբերութիւններու Յանձնախումբի Փոխ-ատենապետուհի Տիկ. Թենի Սիմոնեանին եւ Մեծի Տանն Կիլիկիոյ Կաթողիկոսութեան Եկեղեցիներու Համաշխարհային Խորհուրդի մօտ ներկայացուցիչ Տիկ. Գարլա Խիժոյեանին հետ եւ անոնց փոխանցեց մեր Ս. Աթոռին միջ-եկեղեցական ու միջ-կրօնական մարզերու առաջնահերթութիւնները. յատուկ քննարկման արժանացաւ Եկեղեցիներու Համաշխարհային Խորհուրդի յաջորդ համաժողովը, որ տեղի պիտի ունենայ 2013-ին Քորիայի Պուսան քաղաքին մէջ:

 

LEAVE A REPLY

Please enter your comment!
Please enter your name here