Հալէպի Մէջ Անսովոր Ամայութիւն Եւ Լռութիւն Կը Տիրէ

0
169

Հալէպի մէջ նախօրէին տեղի ունեցած բուռն եւ արիւնալի մարտերէն ետք Հոկտեմբեր 26-ի առաւօտեան իրավիճակը հանգիստ է. ամէնուրեք ամայութիւն եւ լռութիւն կը տիրէ: Այս մասին «Արմենփրես»-ին տեղեկացուց Բերիոյ թեմի ազգային առաջնորդարանի մամլոյ խօսնակ Ժիրայր Ռէյիսեան` յոյս յայտնելով, որ այսպէս ալ կը շարունակուի:

Ռէյիսեան տեղեկացուց, որ Հոկտեմբեր 25-ին բախումներ տեղի ունեցած Աշրաֆիէ եւ Ջալա թաղամասերուն մէջ այժմ կրակոցներ եւ պայթիւններու ձայներ չեն լսուիր: Իսկ բախումներու հետեւանքով մինչեւ այժմ, բարեբախտաբար, տուժածներուն մէջ հայեր չկան:

Անդրադառնալով Ատհայի իսլամական տօնին` Ռէյիսեան նշեց, որ սովորաբար տօնի ժամանակ մարդիկ աղօթք կ’ընեն մզկիթներուն մէջ, ապա կ’ուղեւորուին գերեզմանատուն: Տօնին ժամանակ ոչխար կամ կով կը զոհաբերեն, եւ զայն կը բաժնեն աղքատներուն: Սակայն դեռ յայտնի չէ, թէ ինչ արարողութիւններ պիտի կատարուին այս տարի:

Հայաստանէն Հալէպ ուղարկուած մարդասիրական օգնութեան երկրորդ օդանաւին վերաբերեալ մամլոյ խօսնակը տեղեկացուց, որ օգնութեան ծանրոցները դեռ օդակայան կը գտնուին, քանի որ փաստաթղթային աշխատանքները դեռ չեն աւարտած:

LEAVE A REPLY

Please enter your comment!
Please enter your name here