Դամասկոսի Մէջ Տեղի Ունեցած Պայթումը Խլած Է Հինգ Մարդու Կեանք

0
141

Դամասկոսի մէջ ականապատ ինքնաշարժի պայթումի հետեւանքով Ուրբաթ օր զոհուած է հինգ մարդ, վիրաւորուած՝ աւելի քան երեսուն ուրիշներ:

Պայթումը տեղի ունեցած է Տաֆ ալ Շուք շրջանին մէջ` Օմար Իպն Հատտապի մզկիթին մօտ: Զոհերուն թիւը կրնայ բարձրանալ, կը հաղորդէ Reuters-ը` յղում կատարելով պետական հեռուստատեսութենէն:

Յիշեցնենք, որ մահմետական Ատհա տօնի նախօրէին սուրիական զինուորական հրամանատարութիւնը յայտարարած էր Հոկտեմբեր 26-29 հրադադար կնքելու մասին: Սակայն Սուրիոյ տարածքին գործող առանձին ահաբեկչական խմբաւորումները հրաժարած են հրադադարէն:

Միւս կողմէ,  Երեւանի Առնօ  Պապաջանեան  համերգասրահին մէջ, 26 Հոկտեմբերին տեղի ունեցաւ «Սուրիահայերու հիմնախնդիրներու հիմնադրամը համակարգող կեդրոն» հասարակական կազմակերպութեան շնորհանդէսը: Կազմակերպութիւնը ստեղծուած է ՀՀ սփիւռքի նախարարութեան նախաձեռնութեամբ եւ աջակցութեամբ: Այս մասին կը հաղորդէ «Արմենփրես»-ը: Հասարակական կազմակերպութեան նախագահ, Սուրիոյ հայկական համայնքներու ՀՀ Սփիւռքի նախարարի խորհրդական Լենա Հալաճեան նշած է, որ «Սուրիահայերու հիմնախնդիրներու հիմնադրամը համակարգող կեդրոն»-ը իր աշխատանքները կ’ուղղէ սուիրահայերուն առնչուող ամենատարբեր խնդիրներու:

«Կազմակերպութիւնը ունի շուրջ երկու շաբաթուան կեանք, եւ այս ընթացքին մեզի արդէն անդամակցած է 27 մարդ»,-ըսած է Հալաճեան: Անոր խօսքով` հասարակական կազմակերպութիւնը կը համագործակցի կարգ մը կառոյցներու հետ:

Կազմակերպութիւնը իր գործունէութիւնը պիտի իրականացնէ Հայաստանի բարեգործական ընդհանուր միութեան գրասենեակին մէջ, որ տեղակայուած է Ալեք Մանուկեան փողոցին վրայ:

Շնորհանդէսի ընթացքին Երեւանի պետական երաժշտանոցի ուսանողները Հալէպի երիտասարդական ընկերակցութեան հետ համատեղ ներկաներուն ուշադրութեան ներկայացուցած են համերգային ծրագիր:

Ձեռնարկին ներկայ եղած են միջազգային եւ համահայկական կազմակերպութիւններու ներկայացուցիչներ, պաշտօնատար անձիք, սուրիահայեր:

LEAVE A REPLY

Please enter your comment!
Please enter your name here