Եւրոմիութիւնը Լեռնային Ղարաբաղի Մէջ Քաղաքացիական Հասարակութեան Ծրագրի Նոր Փուլը Սկսած Է

0
134

Լեռնային Ղարաբաղի մէջ սկսած է Եւրոմիութեան կողմէ ֆինանսաւորուող քաղաքացիական հասարակութեան ծրագրի երկրորդ փուլը, որուն նպատակն է աջակցիլ Լեռնային Ղարաբաղի հակամարտութեան գօտիին մէջ խաղաղութեան կառուցման ջանքերուն: Այս մասին՝ ըստ «Արմենփրես»-ին՝ կը տեղեկացնէ ԵՄ Հարեւանութեան քաղաքականութեան տեղեկատուական կենտրոնը:

«Եւրոպական գործընկերութիւն` յանուն Լեռնային Ղարաբաղի հակամարտութեան խաղաղ կարգաւորման» խորագիրով երկրորդ փուլը այն ծրագրի շարունակութիւնն է, որ սկսած է 2009-ին «Կայունութեան գործիքներ»-ու ծիրէն ներս: Ան Լեռնային Ղարաբաղի հակամարտութեան կարգաւորման եւ բոլոր կողմերը ներկայացնող քաղաքական գործիչներու, լրատուամիջոցներու եւ քաղաքացիական հասարակութեան միջեւ աշխոյժ երկխօսութեան վերականգնման կը նպաստէ: «Եւրոպական գործընկերութիւն` յանուն Լեռնային Ղարաբաղի հակամարտութեան խաղաղ կարգաւորման» նախաձեռնութիւնը եւրոպական հինգ հասարակական կազմակերպութիւններու ընկերակցութիւնն է, որ կը ձգտի փոխհամագործակցիլ Հարաւային Կովկասի գործընկերներուն հետ ծրագիրներու յառաջխաղացման ուղղուած տարբեր խաղաղապահ նախագիծերու մէջ, որոնք կրնան դրական արդիւնքներ ունենալ ղարաբաղեան հակամարտութեան կարգաւորման հարցով:

Ծրագրի նոր փուլը հաշուարկուած է երեք տարուան համար: Այն կ’իրականացուի երեք հիմնական թեմաներով` լրատուամիջոցներ, պետական քաղաքականութիւն եւ հակամարտութենէն տուժած բնակչութեան խումբեր: Ծրագիրը կը հետապնդէ հետեւեալ նպատակները` մեծցնել մասնակցութեան խաղաղասիրական նախաձեռնութիւններուն հիմքը ` յատուկ ուշադրութիւն դարձնելով բնակչութեան խոցելի խմբերուն, հակամարտութեան կողմերու միջեւ վստահութիւն հաստատել` մարդկոց միջեւ շփումը խթանելու միջոցով, ժամանակակից վերլուծութիւն եւ նոր գաղափարներու քարոզչութիւն իրականացնել, որոնք ապագայի պատկերացումը կու տան, եւ ազգային ու միջազգային մակարդակով ԼՂ հակամարտութեան շուրջ քաղաքացիական հասարակութեան աշխոյժ մասնակցութիւն ցուցաբերել քաղաքական գործիչներու հետ երկխօսութեան ընթացքին:

ԵՄ Կայունութեան գործիքը յատուկ ֆինանսական գործիք է, որ ստեղծուած է աջակցելու հակամարտութիւններու խաղաղ կարգաւորման եւ անոնց լարուածութիւնը մեղմելու համար:

LEAVE A REPLY

Please enter your comment!
Please enter your name here