ԼՂՀ Ազգային Ժողովը Շնորհակալական Ուղերձ Յղած Է Նոր Հարաւային Ուէյլսին

0
141

ԼՂՀ Ազգային ժողովը ուղերձ յղած է Աւստրալիոյ միութեան Նոր Հարաւային Ուէյլս նահանգի խորհդրարանի վերին պալատին: Այս մասին կը հաղորդէ Արցախի խորհրդարանի լրատուական ծառայութիւնը:

Ուղերձին մէջ կ’ըսուի. «Մենք Լեռնային Ղարաբաղի Հանրապետութեան մէջ երախտագիտութեան խորը զգացողութեամբ տեղեկացանք օրերս ձեր կողմէ ընդունուած բանաձեւին մասին, որով կը ճանչնայ բոլոր ժողովուրդներու, ներառեալ` Լեռնային Ղարաբաղի Հանրապետութեան, ինքնորոշման իրաւունքը: Աւելի քան 20 տարի է, որ մեր ժողովուրդը իր ինքնիշխանութիւնը հաստատած է պատմական բնօրրանին մէջ եւ կը ձգտի ժողովրդավարական համընդհանուր չափանիշներով առաջնորդուող իր պետութեան միջազգային ճանաչման, ազատ եւ ինքնիշխան ժողովուրդներու ընկերակցութեան մէջ իր արժանի տեղին համար:

«Համոզուած ենք, որ Լեռնային Ղարաբաղի Հանրապետութեան միջազգային ճանաչումը կարեւորագոյն եւ վճռորոշ դեր պիտի խաղայ ղարաբաղա-ատրպէյճանական հակամարտութեան կարգաւորման գործընթացին, պիտի նպաստէ տարածաշրջանին մէջ տեւական խաղաղութեան եւ կայունութեան հաստատման:

«Ձեր ընդունած բանաձեւը մեզի յոյս կը ներշնչէ, որ Աւստրալիոյ դաշնային իշխանութիւնները, արձագանգելով Նոր Հարաւային Ուէյլս նահանգի խորհրդարանի նախաձեռնութեան, նոյնպէս պիտի դիմեն համարժէք քայլի` հիմք ընդունելով ժողովուրդներու ազատ ինքնորոշման իրաւունքի գերակայութիւնը:

«Ողջունելով ձեր ընդունած բանաձեւը` մենք յոյս կը յայտնենք, որ Լեռնային Ղարաբաղի Հանրապետութեան եւ Աւստրալիոյ Միութեան իշխանութիւններուն միջեւ տեսանելի ապագային կը ձեւաւորուին միջպետական կապեր` ի շահ միջազգային յարաբերութիւններու մէջ արդարութեան հաստատման, ժողովուրդներու ազատ ինքնորոշման իրաւունքի անվերապահ իրացման»:

Ուղերձը ստորագրած են ԼՂՀ ԱԺ «Հայրենիք», «Ժողովրդավարութիւն», «Դաշնակցութիւն» խմբակցութիւնները եւ «Արցախատուն» պատգամաւորական խումբը:

LEAVE A REPLY

Please enter your comment!
Please enter your name here