Ֆրանսայի Մէջ Ցեղասպանութեան Ժխտումը Քրէականացնող Օրէնքը Պէտք է Ընդունուի Ապրիլ 24-ին Ընդառաջ. Ֆիլիփ Կալտենպախ

0
160

 Ֆրանսայի Սենատի Ֆրանսա-Հայաստան բարեկամութեան խումբի նախագահ Ֆիլիփ Կալտենպախ ընդունած է Ֆրանսահայ ընկերակցութիւններու համակարգող խորհուրդի պատուիրակութիւնը: Հանդիպումին մասնակցած են նաեւ կարգ մը ծերակուտականներ: Այս մասին կը հաղորդէ «Նոր Յառաջ» պարբերականը:

Քննարկման առանցքը եղած են՝ Հայոց ցեղասպանութեան ժխտումը քրէականացնող նոր օրինագծի մշակումը, ՀՀ Նախագահ Սերժ Սարգսեանի` Ֆրանսա, Հայաստանի խորհրդարանականներու` Փարիզ այցելութեան հարցերը: Համակարգող խորհուրդի համանախագահները` Մուրատ Փափազեան եւ Արա Թորանեան, մէկ անգամ եւս ընդգծած են նախագահ Օլանտի` Ցեղասպանութեան ժխտման պատժելիութեան մասին օրէնքի ընդունման յանձնառութիւնը:

Ֆիլիփ Կալտենպախի խօսքով` Ֆրանսա-Հայաստան բարեկամութեան խումբը կը ցանկանայ օրէնքը ընդունուած տեսնել հնարաւորին չափ շուտ` 24 Ապրիլ 2013-ին ընդառաջ: Ան նշած է, որ այս անգամ հարկաւոր է նախապէս մեծ ուշադրութիւն յատկացնել իրաւական եւ քաղաքական բոլոր պայմաններուն, որպէսզի օրինագիծի յաջողութիւնը ապահովուած ըլլայ:

Ֆրանսայի Ազգային ժողովը` 22 Դեկտեմբեր 2011-ին, իսկ Ծերակոյտը` 24 Յունուար 2012-ին ընդունեցին Հայոց Ցեղասպանութեան ժխտման պատժելիութեան օրինագիծը, որ նախագահ Նիքոլա Սարքոզիի վաւերացման ներկայացուելէն առաջ խումբ մը թրքամէտ պատգամաւորներու ջանքերով ներկայացուեցաւ Սահմանադրական դատարան եւ համարուեցաւ հակասահմանադրական:

LEAVE A REPLY

Please enter your comment!
Please enter your name here