Աշխարհի Մէջ Կայ 7.5 Միլիառ Մարդ, 7.5 Միլիառն Ալ Լրագրող Են. Կի Մեթան

0
166

«Նախապէս տպագիր մամուլի խմբագիրը աւելի մեծ ազդեցութիւն ունէր, քան պետութեան ոեւէ նախարար: Սակայն հիմա այդ ազդեցութիւնը նուազած է»,-Այս մասին՝ ըստ «Փաստինֆօ»-ին՝ նշած է Զուիցերիոյ Մամուլի ակումբի նախագահ Կի Մեթան: Ըստ անոր` համացանցը կը նուազեցնէ միւս մետիաներուն կարեւորութիւնը, բայց չի սպանար անոնց: «Հասարակական մետիան աստիճանաբար աւելի եւ աւելի արագ կը զարգանայ, տպաւորութիւն կը ստեղծուի, որ թերթը «կը մեռնի»: Բայց ատիկա այդպէս չէ»,- նշած է ան:

Զուիցերիոյ Մամուլի ակումբի նախագահին խօսքով` «թուղթը ընդդէմ տեղեկատուական արհեստագիտութիւններու (ՏԱ)» պատերազմին մէջ ՏԱ-ն շատոնցէ յաղթած է, բայց ամբողջ պատերազմը դեռ չէ յաղթած: «Ճիշտ է, տպագիր մամուլը իր լսարանը կը կորսնցնէ, բայց չ’անհետանար»,- նշած է ան: Կի Մեթանի խօսքով` լիարժէք է, երբ թերթը եւ համացանցը միասին կ’աշխատին:

Անդրադառնալով պլոքըրներու լրագրութեան վրայ ազդեցութեան՝ զուիցերիացի լրագրողը նշած է, որ իրականութեան մէջ պլոքըրները տեղեկատուութիւն չեն տար: Անոնք պարզապէս «կը զարդարեն» լրագրողին տուած տեղեկատուութիւնը: Այս ալ իր հերթին կ’ապահովէ համացանցային կայքերու բարձր այցելութիւնը: Կի Մեթանի կարծիքով՝ թերթը չի կրնար գոյատեւել, եթէ իր ընկերային կայքին մէջ չունի լաւ պլոքըր

Արդեօք ՏԱ դարաշրջանին, երբ իւրաքանչիւրը կրնայ ըլլալ տեղեկատուութեան կրողը եւ տարածողը, կը տուժէ՞ լրագրութիւնը: Այս հարցումին ի պատասխան` Կի Մեթան նշեց. «Աշխարհի մէջ կայ 7.5 միլիառ մարդ, այդ 7.5 միլիառն ալ լրագրող են: Այս պարագային, երբ 7 միլիառ մարդ տեղեկատուութիւն կը տարածէ, կը ստացուի տեղեկատուութեան ապուր: «Այդ ապուրին մէջ արհեստավարժ լրագրողները կ’ըլլան միսի փոքրիկ գնդիկներ, որոնք ալ լուրը կը բացատրեն եւ կը մատուցեն այլ տեսանկիւնէ»:

LEAVE A REPLY

Please enter your comment!
Please enter your name here