«Սենտի» Փոթորկի Մօտենալուն Պատճառով Նիւ Եորքի Օդակայանները Փակուած Են

0
128

«Սենտի» փոթորկի մօտենալու վտանգին պատճառով փակուած են Նիւ Եորքի օդակայանները:

Եթէ օդերեւութաբաններու կանխատեսումները չարդարանան եւ «Սենտի» շրջանցէ Նիւ Եորքը, ապա օդակայանները կը բացուեն այսօր օրուան երկրորդ կէսին: Վատագոյն պարագային անոնք աւելի երկար ժամանակով փակ պիտի մնան:

Կ’ենթադրուի, որ «Սենտի» կը մոլեգնի Նիւ Եորքի մէջ Հոկտեմբեր 29-ին օրուան առաջին կէսին: Նիւ Եորքի կառավարիչը յայտարարած է, որ քաղաքի փապուղիներու, փոխադրակառքերու եւ շոգեկառքերու համակարգերը կիրակի գիշերուընէ սկսեալ կը դադրին գործելէ:

Ինչպէս նաեւ, «Սենտի» փոթորիկը երէկ Միացեալ Նահանգներու նախագահութեան թեկնածուները ստիպած է ժամադրութիւնները վերատեսութեան ենթարկել եւ ընտրական հաւաքներ ջնջել:

Միացեալ Նահանգներու նախագահ Պարաք Օպամա արտակարգ դրութեան պատասխանատուներուն հետ ժողով մը գումարած է` քննարկելու համար փոթորիկի դիմակայման քայլերը: Ժամական 120 քիլոմեթր արագութեամբ փչող փոթորիկը, որ շատ հաւանաբար այսօր Միացեալ Նահանգներու արեւմտեան ափը հարուածէ, կրնայ առաւել եւս զօրանալ` միանալով շրջանին մօտեցող ձմեռնային փոթորիկի մը:

Միացեալ Նահանգներու նախագահական ընտրութեան մէջ կարեւոր դերակատարութիւն ունեցող շարք մը նահանգներ եւ 60 միլիոն ամերիկացիներ կրնան վնասներ կրել փոթորիկէն, որ Գուպայի մէջ աւելի քան 130 հազար բնակարան քանդած էր: 

«Սենտի» անցեալ շաբաթ Քարյիպեան կղզիներու շրջանին մէջ  խլած էր 60 զոհ:

LEAVE A REPLY

Please enter your comment!
Please enter your name here