Հայաստանը Բարգաւաճութեան Աստիճանով Աշխարհի 98-րդն Է

0
184

Լոնտոնի մէջ տեղակայուած «Լեկաթում» վերլուծական հաստատութեան պատրաստած զեկոյցները կը փոխանցուին որեւէ երկրի մէջ մասնաճիւղ բանալու մտադրութիւն ունեցող ընկերութիւններուն, ինչպէս նաեւ միջազգային հետազօտական հաստատութիւններուն:

«Ազատութիւն» ձայնասփիւռի փոխանցմամբ՝ այս տարուան զեկոյցին մէջ ընդգրկուած է 142 պետութիւն, ուր կ’ապրին մոլորակի բնակչութեան 96 տոկոսը եւ կ’արտադրուի աշխարհի համախառն արդիւնքի 99 տոկոսը:

«Լեկաթում»-ի վերլուծաբանները ցուցիչը կազմելու համար հաշուի կ’առնեն 8 գործօն` տնտեսութիւն, գործարարութիւն, կառավարում, կրթութիւն, առողջապահութիւն, անվտանգութիւն, անձնական ազատութիւն եւ ընկերային ներուժ:

Զեկոյցին մէջ պետութիւնները դասուած են չորս կարգի` բարգաւաճութեան բարձր, միջինէն բարձր, միջինէն ցած եւ ցած աստիճանի:
Հայաստանը այդ ցուցիչով միջինէն ցած կարգին է եւ 142 պետութիւններու ընդհանուր ցանկին մէջ կը գրաւրէ 98-րդ տեղը:

Հայաստանի տնտեսութիւնը աշխարհի մէջ 129-րդն է: Ասիկա կը նշանակէ, որ 128 երկիրներու մէջ աւելի արդիւնաւէտ մաքրոտնտեսական քաղաքականութիւն է, զարգացում եւ ֆինանսական հատուածի արդիւնաւէտութիւն:

Գործարարութեան ենթացուցիչը «Լեկաթում»-ը կը կազմէ` հիմք առնելով գործարարի համար ստեղծուած պայմանները, անոր տրուող հնարաւորութիւնները: Այս հարցով Հայաստանը 81-րդ երկիրն է:

Կառավարումը կ’ենթադրէ պատասխանատու կառավարութիւն, արդար ընտրութիւններ, քաղաքական մասնակցութիւն եւ օրէնքի գերակայութիւն: Այդ ենթացուցիչով Հայաստանը աշխարհի մէջ 97-րդն է:

Առողջապահութեամբ Հայաստանը 98-րդն է, մինչդեռ կրթութեամբ, որ հաշուի կ’առնուին կրթութեան մատչելիութիւնը, որակը եւ մարդկային ներուժը, բաւական բարձր` 44-րդն է:

Համեմատաբար աւելի լաւ կը համարուի անվտանգութիւնը, որ կ’որոշուի պետութեան եւ անձի անվտանգութեամբ. այդ ենթացուցիչով Հայաստանը 61-րդն է:

Ամենավատ ցուցանիշները կը վերաբերին անձնական ազատութեան եւ ընկերային ներուժին. այդ բնագաւառներուն մէջ երկիրը կը գրաւէ 122-րդ եւ 124-րդ տեղերը:

Անձնական ազատութեան ցուցիչը կ’որոշուի երկու հանգամանքով` անձի ազատութեան եւ հանրային հանդուրժողականութեան:
Ընկերային ներուժը (social capital) կը վերաբերի բնակչութեան աշխուժութեան, բարեգործութեան ներգրաւուածութիւն, ընտանիքներիւ մասնակցութիւնը համայնքային կեանքին:

Հայաստանի հարեւաններ Ատրպէյճանը եւ Վրաստանը փոքր-ինչ աւելի լաւ վիճակի մէջ են եւ կը զբաղեցնեն, համապատասխանաբար, 94-րդ եւ 95-րդ տեղերը, Թուրքիան 89-րդն է, Իրանը` 102-րդը:

Բարգաւաճութեան աստիճանով ամենավատ վիճակի մէջ են Աֆղանիստանը, Գոնկօն եւ Կեդրոնական Ափրիկեան Հանրապետութիւնը:
Իսկ ամենաբարգաւաճ երկիրներու առաջին եռեակին մէջ են՝ Նորվեկիան, Դանիան եւ Շուէտը:

 

LEAVE A REPLY

Please enter your comment!
Please enter your name here