Հայոց Ցեղասպանութեան Մասին Հրատարակութիւնը` Ամէնէն Շատ Վաճառուած Գիրքը Թուրքիոյ Մէջ

0
177

«1915. Հայոց Ցեղասպանութիւն» գիրքին հեղինակը ցեղասպանութեան կազմակերպիչներէն Ճեմալ փաշայի թոռնիկն է:
Թուրք ճանչցուած լրագրող Հասան Ճեմալի` Հայոց Ցեղասպանութեան մասին անցեալ ամիս հրատարակած գիրքը արդէն ամէնէ շատ վաճառուողը դարձած է Թուրքիոյ մէջ, ինչ որ ցոյց կու տայ այս հարցին նկատմամբ աճող հետաքրքրութիւնը թրքական հասարակութեան մէջ: Այդ մասին՝ ըստ «Ազատիւթիւն» ձայնասփիւռի կայանին՝ կը հաղորդէ Zaman-ի յօդուածագիրը:

Zaman-ը կ’ընդգծէ, որ աղմկայարոյց այս գիրքին հեղինակը երիտթուրքերու կառավարութեան առանցքային դէմքերէն մէկուն` Ճեմալ փաշայի թոռն է, որ ոչ միայն փաստագրական տուեալներ ներկայացուցած է ողբերգութեան վերաբերեալ, այլ նաեւ պատմած է, թէ ինչպէս փոխուած են իր անձնական ապրումները, եւ ինչ ճանապարհ անցած է ինքը մերժումէն մինչեւ Հայոց ցեղասպանութեան ճանաչում:

Ծաւալուն աշխատութիւնը, մասնաւորապէս, կը սկսի այս հարցին վերաբերեալ հեղինակին` դեռ 30 տարի առաջ հրապարակած առաջին յօդուածէն, ուր Ճեմալ փաշայի թոռը պաշտպանած էր Թուրքիոյ կառավարութեան պետական դիրքորոշումը, եւ կ’աւարտի նոյն թեմային շուրջ արդէն անցեալ տարի Քալիֆորնիոյ համալսարանին մէջ ունեցած ելոյթով, ուր Հասան Ճեմալը հրապարակաւ ճանչցած է Հայոց Ցեղասպանութիւնը:

Սեփական տպաւորութիւններէն եւ տեսակէտներէն բացի, Հասան Ճեմալը գիրքին մէջ նաեւ մէջբերած է պապի` Ճեմալ փաշայի յիշողութիւնները, որոնք հրապարակուած են 1919 թուականին Գերմանիոյ մէջ: Անցեալ դարու սկիզբը լոյս տեսած այդ յուշերուն մէջ ցեղասպանութեան կազմակերպիչներէն մէկը համարուող Ճեմալ փաշան, մասնաւորապէս, պնդած էր, թէ կատարուածին մէջ մեղաւոր է ռուսական քաղաքականութիւնը, որ, ըստ անոր, ստորաբար հրահրած էր հայերն ու թուրքերը իրարու դէմ:

Փաստելով, որ գիրքին հեղինակին կամ հրատարակիչին նկատմամբ մինչեւ այսօր որեւէ հետապնդում չէ իրականացուած Թուրքիոյ մէջ` Zaman-ը կը շարունակէ.- «Ասիկա ցոյց կու տայ, թէ որքան առաջ կ’երթայ Թուրքիան թապուները յաղթահարելու ճանապարհին:

«Ժամանակին Հրանդ Տինքը ըսած էր. – «Առաջինը անհրաժեշտ է ոչ թէ ժխտել կամ ճանչնալ, այլ` տեղեկանալ կատարուածին»: Համոզուած եմ` այս խօսքերը հրատապ են նաեւ այսօր», – կ’եզրափակէ Zaman-ի յօդուածագիրը:

LEAVE A REPLY

Please enter your comment!
Please enter your name here