ՀՀ ԱԳՆ-ը Հրապարակած Է Հալէպի Մերձակայքին Առեւանգուած Հայերուն Անունները

0
141

Հայաստանի արտաքին գործոց նախարարութիւնը կը հաստատէ տեղեկութիւնը այն մասին, որ Հոկտեմբեր 29-ին Պէյրութէն Հալէպ ուղեւորուող քաղաքացիական հանրակառքի 10 ուղեւորներ առեւանգուած են, որոնց շարքին` 7 հայեր: Արդէն իսկ յայտնի են առեւանգուած հայ ուղեւորներէն 5-ին անունները: Այս մասին՝ ըստ «Արմենփրես»-ին՝ յայտնած է Արտաքին գործոց նախարարութեան մամլոյ խօսնակ Տիգրան Պալայան:

Առեւանգուածներուն անունները` Կարօ Փամփալեան, Արսէն Արոյեան, Լեւոն Զէյթունեան, հայր եւ որդի Պաշար եւ Ճորճ Ռաբաթներ:

Իր հերթին Հալէպի Ազգային առաջնորդարանի մամլոյ խօսնակ Ժիրայր Ռեյիսեան տեղեկացուցած է նաեւ 6-րդ հայ առեւանգուածին մասին: Վերջինս Գօգօ անունով հայ մըն է, որուն ազգանունը դեռեւս կը ճշդուի: Ռէյիսեանի խօսքով` բոլոր 10 առեւանգուածներուն անունները դեռ չկան, այժմ աշխատանքներ կը տարուին անոնց անվտանգ կերպով Հալէպ վերադարձնելու ուղղութեամբ: Լուրեր կը շրջանառուին, որ առեւանգուածներուն մէջ մէկ ասորի եւ մէկ քիւրտ կայ:

Ռէյիսեան նաեւ հերքած է այն լուրը, թէ առեւանգուածներուն համար փրկագին պահաջած են:

Հալէպի մերձակայքին զինեալ ընդդիմադիրները Հոկտեմբեր 29-ին կանգնեցուցած են Պէյրութէն Հալէպ ուղեւորուող քաղաքացիական հանրակառքը եւ առեւանգած 10 մարդու:

Ոչ պաշտօնական տեղեկութիւններու համաձայն` ընդդիմադիրները կառավարութեան կոչ ըրած են վերադարձնել իրենց 150 ընկերները, եւ իրենք ազատ կ’արձակեն առեւանգուածները:

LEAVE A REPLY

Please enter your comment!
Please enter your name here