Ֆրանսա`Ցեղասպանութեան 100-Ամեակին Ընդառաջ

0
123

 CCAF-ի (Ֆրանսահայ ընկերակցութիւնները համակարգող խորհուրդ) ազգային խորհուրդի վերջին ժողովին, որ տեղի ունեցած էր 2012 Սեպտեմբեր 29-ին, որոշուած էր նախաձեռնել Ֆրանսայի մէջ՝ Հայոց ցեղասպանութեան 100-ամեակի արարողութեանց եւ միջոցառումներու պատրաստութեան աշխատանքին: Այս մասին կը յայտնէ Ֆրանսայի ՙՆոր Յառաջը՚-ը։

Ալեքսի Կէօվճեան, որուն յանձնուած է այդ պատրաստութիւնները համակարգելու պաշտօնը, գործակցութեամբ CCAF-ի համանախագահներ Արա Թորանեանի եւ Մուրատ Փափազեանի, կազմակերպած է CCAF-ի անդամ բոլոր ընկերակցութիւններուն մասնակցութեամբ խորհրդակցական ժողով մը, որ տեղի ունեցած է օրերս՝ ՀԲԸՄ-ի Փարիզի «Ալեք Մանուկեան» մշակութային կեդրոնին մէջ:

Այս ընդհանուր ժողովին գլխաւոր նպատակը եղած է՝ ամփոփել անդամ ընկերակցութեանց կարծիքներն ու առաջարկները, ճշդել կատարուելիք աշխատանքին գլխաւոր ուղղութիւնները, ուրուագծել հարիւրամեակի միջոցառումներու եւ արարողութիւններու նախնական ծրագիր մը:

Այս հանդիպումին իրենց մասնակցութիւնը բերած են՝ Երեւանի Ցեղասպանութեան հիմնարկ-թանգարանի տնօրէն Հայկ Դեմոյեան, դեսպանորդ Վահագն Աթաբեկեան, Հայց. Առաքելական Եկեղեցւոյ Ֆրանսայի Թեմական խորհուրդի նախագահ Փաթրիս Ճօլօլեան, ինչպէս նաեւ CCAF-ի անդամ ֆրանսահայ ընկերակցութեանց նախագահներն ու ներկայացուցիչները, որոնք առիթը ունեցած են կարծիքներ փոխանակելու:

CCAF-ը կը յայտարարէ, թէ խորհրդակցական նման երկու հանդիպումներ եւս պիտի կազմակերպուին՝ մէկը Լիոն եւ միւսը Մարսիլիա, նախքան CCAF-ի յաջորդ ազգային խորհուրդին՝ աւելի յստակ գիծերու սահմանումը: Համակարգումի եւ տեղեկատուական աշխատանքները դիւրացնելու նպատակով՝ որոշուած է ներկայացուցիչներ նշանակել իւրաքանչիւր շրջանի համար: Արդէն, Փարիզի շրջանի որպէս ներկայացուցիչ նշանակուած է CDCA-էն Յարութ Մարտիրոսեան:

 

LEAVE A REPLY

Please enter your comment!
Please enter your name here