Ատրպէյճանը Ուղղակի Կը Ծաղրէ ԵԱՀԿ-ի Մինսկի Խումբը, ՄԱԿ-ը Եւ Ամբողջ Համաշխարհային Հանրութիւնը

0
125

Պաշտօնական Պաքուն կոչ կ’ընէ ԵԱՀԿ Մինսքի խումբի համանախագահներուն «աւելի աշխոյժ ըլլալ» ղարաբաղեան հակամարտութեան կարգաւորման մէջ: Այդ մասին Չորեքշաբթի օրը լրագրողներուն յայտարարած է Ատրպէյճանի նախագահի աշխատակազմի քաղաքական վերլուծութեան եւ տեղեկատուական ապահովման բաժնի վարիչ Էլնուր Ասլանով: Անոր խօսքով, «այս հարցով պէտք է աշխոյժ ըլլայ ոչ միայն ԵԱՀԿ Մինսքի խումբը, այլ նաեւ ՄԱԿ-ի Անվտանգութեան խորհուրդը»: «Որոշ պարագաներու ՄԱԿ ԱԽ-ն քանի մը ժամուան ընթացքին կ’իրագործէ իր բանաձեւերը, բայց, ցաւօք սրտի, կազմակերպութիւնը արդէն 20 տարի չափազանց անտարբեր է ղարաբաղեան հակամարտութեան վերաբերեալ ընդունած իր բանաձեւերուն նկատմամբ: Այս մասին կը հաղորդէ panarmenian.net կայքը:

«Ուստի մենք կոչ կ’ընենք միջազգային հանրութեան աւելի աշխոյժ ըլլալ այս հարցով»,- ըսած է Ասլանովը:

Ատրպէյճանական կողմի այսպիսի յայտարարութիւնները մեկնաբանելը ուղղակի ծիծաղելի է: Բաւական է յիշել, որ Պաքուն կ’անտեսէ նոյնիսկ Մինսքի խումբի բոլոր կոչերը եւ առաջարկները, ինչպէս, օրինակ, հետեւիլ հրադադարի ռեժիմին, դիպուկահարները հեռացնել առաջին գիծէն, մեքանիզմներ մշակել միջադէպերու հետաքննութեան համար: Պաքուն կը ձախողեցնէ ղարաբաղեան հակամարտութեան կարգաւորման շուրջ բանակցութիւնները, Հայաստանին եւ Ղարաբաղին մշտապէս կը սպառնայ պատերազմով, անհամար քանակութեամբ սպառազինութիւն կը գնէ եւ կ’արտադրէ:

Ատրպէյճանին աւելորդ չէ յիշեցնել, որ ՄԱԿ-ի բանաձեւերը կը կրեն երաշխաւորական բնոյթ:

Ուրեմն կարելի է եզրակացնել, որ Ատրպէյճանը ուղղակի կը ծաղրէ ԵԱՀԿ Մինսքի խումբը, ՄԱԿ-ը եւ ամբողջ համաշխարհային հանրութիւնը եւ կը ծաղրէ անպատիժ:

LEAVE A REPLY

Please enter your comment!
Please enter your name here