Թուրքիա Եւրոմիութեան Հետ Բանակցութիւններու Վերջնաժամկէտ Կը Նշէ

0
127

«Եթէ մինչեւ 2023 թուականը Թուրքիոյ` Եւրոմիութեան անդամակցելու հարցը չլուծուի, ապա Եւրոպան կը կորսնցնի մեզ»,- Չորեքշաբթի օրը Պերլին կատարած այցի ժամանակ յայտարարած է Թուրքիոյ վարչապետ Ռեճէպ Թայիփ Էրտողան` առաջին անգամ պաշտօնական Անգարայի եւ եւրոպական կառոյցներու յարաբերութիւններուն ամբողջ պատմութեան ընթացքին՝ մատնանշելով անդամակցութեան բանակցութիւններու հնարաւոր վերջնաժամկէտը:

Թուրքիոյ հետ անդամակցութեան բանակցութիւնները պաշտօնապէս մեկնարկեցին 2005 թուականի աշնան, սակայն որոշ ժամանակ անց կանգ առին: Հիմնական պատճառը Կիպրոսի շուրջ Թուրքիոյ որդեգրած անհաշտ մօտեցումն էր, երբ Թուրքիան սկիզբը համաձայնեցաւ բանալ իր նաւահանգիստներն ու օդանաւակայանները կիպրոսեան փոխադրամիջոցներու ընկերութիւններուն համար, իսկ յետագային հրաժարեցաւ կատարել իր իսկ ստանձնած պարտաւորութիւնը:

«Մենք կը ճանչնանք Հիւսիսային Կիպրոսը իբրեւ անկախ պետութիւն: Ուրիշները կրնան ատիկա չընել, սակայն տիկին Մերքէլը նախապէս ալ ըսած է, որ Հարաւային Կիպրոսը Եւրոմիութեան կազմին մէջ ընդգրկելը սխալ էր, եւ այդ թերի կացութիւնը այսօր ալ կը պահպանուի: Պէտք է հասկնալ, որ Թուրքիան Եւրոմիութեան հետ շուրջ 50 տարի շարունակուող այս գործընթացին մէջ ի վերջոյ յստակ արդիւնքի պէտք է հասնի: Նման վերաբերմունք ցուցաբերուած է միայն մեր երկրին հանդէպ: Ի վերջոյ, մեզի անհրաժեշտ է յաղթահարել այս ամէնը», – Պերլինի մէջ կայացած համատեղ մամուլի ասուլիսի ժամանակ յայտարարած էր թրքական կառավարութեան ղեկավարը:

Գերմանական կողմը, սակայն, Էրտողանին այս առումով որեւէ յստակ խոստում այդպէս ալ չտուաւ: Միայն արտաքին գործոց նախարար Կիտօ Վեսթերուելն էր, որ չբացառեց, թէ Թուրքիա – Եւրոմիութիւն բանակցութիւնները կրնան վերսկսուիլ 2013 թուականին: Գերմանիոյ վարչապետ Անկելա Մերքէլ, իր հերթին, գերադասեց խօսիլ այն քայլերուն մասին, որ պէտք է իրագործէ պաշտօնական Անգարան:

«Եւրոմիութիւնը ազնիւ բանակցային գործընկեր է, եւ բանակցութիւնները դեռ կը շարունակուին: Հրապարակուած է Թուրքիոյ` Եւրոմիութեան անդամակցութեան ճանապարհին ցուցաբերած յառաջընթացին մասին հերթական զեկոյցը, եւ այնտեղ շատ կարեւոր կէտեր կան, որոնք հարկաւոր է իրագործել: Գերմանիա բանակցութիւնները շարունակելու կողմնակից է, եւ ես կը կարծեմ, որ թէ՛ վարչապետ էրտողանը եւ թէ՛ Եւրոմիութեան կառոյցներն ու անդամ պետութիւնները ազնուօրէն կը վարեն այդ բանակցութիւնները», – յայտարարած է Մերքէլ:

Թուրքիոյ եւ Եւրոմիութեան միջեւ անդամակցութեան շուրջ բանակցութիւնները բաժանուած են 35 առանձին ոլորտներու: Անոնցմէ միայն մէկուն` գիտութեան ոլորտի շուրջ բանակցութիւններն են, որ ամբողջութեամբ աւարտած են:

LEAVE A REPLY

Please enter your comment!
Please enter your name here