Հալէպի Հայաշատ Թաղամասերուն Մէջ Իրավիճակը Համեմատաբար Հանգիստ է. Ժիրայր Ռէյիսեան

0
125

Հալէպի հայաշատ եւ քրիստոնէական թաղամասերուն մէջ իրավիճակը համեմատաբար հանգիստ է: Այս մասին «Արմենփրես»-ին տեղեկացուցած է Բերիոյ թեմի ազգային առաջնորդարանի մամլոյ խօսնակ Ժիրայր Ռէյիսեան` աւելցնելով, որ որոշ թաղամասերու մէջ, սակայն, կը շարունակուին բախումները: Ռէյիսեանի խօսքով` հանգիստ իրավիճակին զուգահեռ մարդոց տրամադրութիւնը աւելի լաւ է, անոնք կը փորձեն վերադառնալ բնականոն կեանքին: Ինչ կը վերաբերի Հալէպի մերձակայքին առեւանգուած հայերուն, ապա Ռէյիսեան նշած է, որ դեռ փոփոխութիւն չկայ: Անոնց ազատ արձակելու ուղղութեամբ աշխատանքները կը շարունակուին:

Զինեալ ապստամբները Հոկտեմբեր 29-ի երեկոյեան ժամը 18:00-ի մօտ Պէյրութէն Հալէպ ուղեւորուող «Զէյթունի թուրզ» ընկերութեան պատկանող հանրակառքը կանգնեցուցած են Հալէպի մօտ գտնուող Սարաքէպ քաղաքը եւ սկսած են ստուգել հանրակառքը: Այնուհետեւ անոնք իջեցուցած են ուղեւորները եւ առանձնացուցած քրիստոնեաները, որմէ ետք ազատ արձակած են կիներն ու երեխաները, սակայն իրենց մօտ պահած են 11 տղամարդիկ, որոնցմէ եօթը հայազգիներ են, իսկ մնացեալը ասորի եւ քիւրտ: Տեղեկութիւններ կան, որ սեւազգեստ զինուած ապստամբները տղամարդոց ծունկի բերած են եւ սկսած են հարուածել, այնուհետեւ տարած անորոշ ուղղութեամբ: Արդեն յայտնի է քանի մը առեւանգուած հայերուն ինքնութիւնը` Կարօ Փամփալեան, Արսէն Արոյեան, Լեւոն Զէյթունեան, հայր եւ որդի Պաշար եւ Ճորճ Ռաբաթներ:

Բախումները սուրիական այլ քաղաքներու մէջ կը շարունակուին: Արաբական ՍԱՆԱ գործակալութիւնը կը հաղորդէ, որ Դամասկոսի մերձակայքին գտնուող Սէյիտա Զէյնապ արուարձանին մէջ Հոկտեմբեր 31-ին տեղի ունեցած պայթումի հետեւանքով 11 մարդ զոհուած է, 25-ը` վիրաւորուած: Վիրաւորներու մէջ կան նաեւ երեխաներ:

 

 

LEAVE A REPLY

Please enter your comment!
Please enter your name here