Ռաֆֆի Յովհաննիսեան Յառաջիկայ Նախագահական Ընտրութիւններուն Կ’առաջադրէ Իր Թեկնածութիւնը

0
121

«Ժառանգութիւն» կուսակցութեան առաջնորդ Ռաֆֆի Յովհաննիսեան կ’առաջադրէ իր թեկնածութիւնը յառաջիկայ նախագահական ընտրութիւններուն: Այս մասին կը հաղորդէ «Արմէնփրես»-ը:

Նոյեմբեր 2-ին հրաւիրուած ասուլիսի ընթացքին Ռաֆֆի Յովհաննիսեան, յայտարարելով այս մասին, իր որոշումը պայմանաւորեց երկրին մէջ ստեղծուած իրավիճակով, որ կը թելադրէ իրեն սեփական ջանքերը ներդնել առկայ խնդիրներու լուծման գործին: «Յառաջիկայ նախագահական ընտրութիւններուն մասնակցութեան հրաւէր կը յղեմ մտաւորականներուն, հանրահային հոսաքներու գործիչներուն, քաղաքական կուսակցութիւններուն, բոլոր հայերուն եւ հայաստանցիներուն, որոնք կը հաւատան, որ մեր երկիրը մէկ հոգիի սեփականութիւն չէ, այլ Հայաստանի Հանրապետութիւն, որ Հայաստանի նախագահը իր սեփական օրինակով պէտք է կրէ օրէնքի ամբողջ ուժը, խստութիւնը եւ պատասխանատուութիւնը: Կը հրաւիրեմ զանոնք, որոնք կ’ուզեն տեսնել  իրենց հանրապետութեան արժէքն ու առաջատարութիւնը գնահատող, որոնք կը գնահատեն ազգային շահի իրացման, հետապնդման եւ հռչակման անհրաժեշտութիւնը, զանոնք, որոնք կը համարեն, որ հայրենի հողին զուգահեռ արժէք է նաեւ մարդը»,- նշած է քաղաքական գործիչը:

Ան յայտարարած է, որ կը կրէ իր քայլերուն, իր խօսքերուն ամբողջ պատասխանատուութիւնը: «Մէկ բան ես երբեք չեմ հանդուրժած եւ պիտի չհանդուրժեմ. ատիկա սուտն ու կեղծիքն է»,- ըսաւ Յովհաննիսեան` ազատ, արդար ընտրութիւններու պարագային կանխատեսելով լուրջ մրցակցութիւն: Ոչ արդար ընտրութիւններու պարագային ան պատրաստ է քաղաքացիական պայքար տանելու «մինչեւ վերջ, մինչեւ յաղթանակ»: Ռաֆֆի Յովհաննսիեան նաեւ յայտարարած է, որ   միայն մէկ անգամ պիտի ըլլայ նախագահի թեկնածու եւ այլեւս երբեք: Ան բոլոր մնացած յարակից հարցերուն պիտի պատասխանէ յաջորդ մամւոյ ասուլիսի ժամանակ:

Նախագահական ընտրութիւնները Հայաստանի մէջ ծրագրուած են Փետրուար 2013-ին: Հայաստանի Հանրապետական կուսակցութիւնը յայտարարած է, որ Դեկտեմբեր 15-ին համագումար պիտի հրաւիրէ գործող նախագահ Սերժ Սարգսեանի թեկնածութիւնը առաջադրելու որոշում կայանցելու համար: «Օրինաց երկիր» կուսակցութիւնը, որ համաձայնական յուշագիրով պարտաւորուած է սատարելու Սերժ Սարգսեանի թեկնածութիւնը, քաղաքական որոշումներու համար համագումար պիտի կայացնէ Դեկտեմբեր 22-ին:

LEAVE A REPLY

Please enter your comment!
Please enter your name here