Ատրպէյճանի Մօտ ԱՄՆ Դեսպանին Թոյլ Չեն Տուած Ջուղայի Հին Հայկական Գերեզմանոցը Այցելել

0
58

Ատրպէյճանի մօտ ԱՄՆ դեսպան Ռիչըրտ Մորնինկսթար հանդէս եկած է յայտարարութեամբ` տարաշրջանին մէջ մշակութային ժառանգութեան պաշտպանութեան հարցով: Յայտարարութեան մէջ նշուած է, թէ Ատրպէյճանի մօտ նշանակուելէ ետք` Մորնինկսթար սկսած է ծանօթանալ երկրի պատմութեան եւ մշակոյթին հետ: Այցելած է Նախիջեւան, Լեանգեարան, Շեքի, Օկուզ, Կուպու եւ Լախիճ: Այդ ուղեւորութիւնները հնարաւորութիւն տուած են ծանօթանալու երկրի բազմազան մշակութային ժառանգութեան հետ:

«Տարածաշրջանը բարդ պատմութիւն ունի, եւ ղարաբաղեան հակամարտութիւնը դարձած է հազարաւոր մարդոց մահուան պատճառ, լրջօրէն ազդած վայրերուն վրայ, որոնք ունին կրօնական եւ մշակութային կարեւոր ազդեցութիւն: Այցելելով Նախիջեւան, ես պաշտօնատար անձանց հետ քննարկած եմ Ջուղայի հին հայկական գերեզմանոցի քանդուելուն փաստը: Կ’ափսոսամ, որ պաշտօնական անձինք անհնար դարձուցած են իմ այցելութիւնը այդ վայր` պատճառաբանելով զայն անվտանգութեան հարցերով»,- նշուած է անոր յայտարարութեան մէջ, կը տեղեկացնէ PanArmenian.net-ը` վկայակոչելով contact.az-ը:

«Միեւնոյն ժամանակ, զիս կ’ոգեշնչեն ջանքերը, որոնք կը ձեռնարկուին երկու երկիրներու կողմէ իրարու մշակութային ժառանգութիւնը պահպանելու համար: Օրինակ, ես Պաքուի մէջ այցելած եմ սուրբ Գրիգոր Լուսաւորիչի հայկական եկեղեցի: Ինծի պատմած են եկեղեցւոյ պատմութեան, գիրքերու, հայերէն լեզուով ձեռագրերու մասին: Պատմած են հայկական եւ ատրպէյճանական գերեզմանոցներու փոխադարձ պաշտպանութեան մասին հայկական եւ ատրպէյճանական գիւղերու միջեւ համաձայնութեան մասին:
ԱՄՆ կ’աջակցի Հայաստանին եւ Ատրպէյճանին երկու երկիրներու պատմական արխիւները պահպանելու ձգտումին մէջ: Օրինակ, յաջորդ շաբաթ ԱՄՆ-ը պիտի ըլլան Հայաստանի եւ Ատրպէյճանի արխիւավարները, որոնք վերապատրաստում պիտի անցնեն նիւթական-մշակութային ժառանգութիւնը պահպանելու վերաբերեալ: Նման ջանքերը գովելի են, մենք յետագային եւս պատրաստ ենք սատարելու նման ջանքերուն»,- կը նշուի Մորնինկսթարի յայտարարութեան մէջ:

LEAVE A REPLY

Please enter your comment!
Please enter your name here