ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ՔՐԻՍՏՈՆԵԱՅ-ԻՍԼԱՄ ԵՐԿԽՕՍՈՒԹԵԱՆ

0
122

 Վերջերս, Եկեղեցիներու Համաշխարհային Խորհուրդի (WCC) եւ Իրանի Միջ-կրօնական Երկխօսութեան կեդրոնի (CID) միջեւ կայացաւ Միջ-կրօնական Երկխօսութեան 6-րդ հանդիպումը Ժընեւի մէջ: Սոյն ժողովին Մեծի Տանն Կիլիկիոյ Կաթողիկոսութեան կողմէ մասնակցեցաւ Գերշ. Տ. Սեպուհ Արք. Սարգիսեան: Մասնակիցներուն շարքին էին Իրանէն, Զուիցերիայէն, Գերմանիայէն, Ամերիկայէն, Լիբանանէն, Անգլիայէն, Եւ Փաքիստանէն աստուածաբաններ:

            Ժողովին բացումը կատարուեցաւ ներկայութեամբ Ե.Հ. Խորհուրդի Ընդհ. Քարտուղար Դոկտ. Օլավ Թվէյթի:Խորհրդակցութեան ընդհանուր թեման էր «Միջկրօնական Երկխօսութիւնն ու այսօրուայ Ընկերութիւնը. Ճանապարհներ, Միջոցներ եւ նպատակներ»: Ժողովին դասախօսեց նաեւ Սեպուհ Արք. Սարգիսեան «Հոգեւոր Առաջնորդներու եւ Մտաւորականութեան Դերը` Միջկրօնական Երկխօսութեան արդիւնքները ժողովուրդին մատուցանելու աշխատանքնին մէջ» նիւթին շուրջ: Ժողովին ընթացքին քննարկուող նիւթերուն շարքին էին նաեւ կանանց եւ երիտասարդութեան դերակատարութիւնը` միջ-կրօնական երկխօսութեան մէջ, եւ հաղորդակցութեան բոլոր միջոցներուն օգտագործման կարելիութիւնները` ժողովուրդներու միջեւ միջ-կրօնական երկխօսութեան սերմերը ցանելու կապակցութեամբ:

            Յայտնենք, որ սոյն երկխօսութիւնը Ե.Հ.Խորհուրդի Իրանի միջեւ սկիզբ առած էր 1995-ին, Ն.Ս.Օ.Տ.Տ. Արամ Ա. Կաթողիկոսի քաջալերանքով, երբ Վեհափառ Հայրապետը Ե.Հ.Խորհուրդի Կեդրոնական Վարչութեան Ատենապետն էր:

 

LEAVE A REPLY

Please enter your comment!
Please enter your name here