Ամերիկայի Հայկական Համագումարի Խորհուրդի Անդամը Գոնկրէսականներու Հետ Քննարկած է Ցեղասպանութեան Հարցը

0
126

  Ամերիկայի Հայկական Համագումարի Խորհուրդի անդամ Աննի Թոթահ հանդիպած է ԱՄՆ Գոնկրէսի անդամներու հետ: Այս մասին` ըստ Armenpress.am-ի` փոխանցած են համագումարէն: Գոնկրէսի անդամներուն հետ հանդիպման ժամանակ` Թոթահ շարունակած է բարձրացնել շարք մը առանցքային հարցեր:

Ծերակուտական Պիլ Նելսընի հետ հանդիպման ընթացքին` խորհուրդի անդամը քննարկած է Հայոց Ցեղասպանութեան բանաձեւին կարեւորութիւնը եւ յորդորած է ծերակուտականը` հովանաւորելու մարդու իրաւունքներու պաշտպանութեան միտուած այս կարեւոր օրէնսդրութիւնը: Ծերակուտական Ռոպերթ Մենենտեսի եւ Մարք Քրքի կողմէ Հայոց Ցեղասպանութեան վերաբերեալ բանաձեւը ներկայիս կը քննարկուի Ծերակոյտի Արտաքին յարաբերութիւններու յանձնաժողովին կողմէ: 

Գոնկրէսական Սթենի Հոյերի հետ հանդիպման ընթացքին` Աննի Թոթահ Համագումարի գործադիր տնօրէն Պրայեան Արտունիի հետ մէկտեղ ընդգծած է ԱՄՆ-Հայաստան յարաբերութիւններու կարեւորութիւնը, ինչպէս նաեւ խօսած Սուրիոյ մէջ շարունակուող հակամարտութեան շուրջ կառոյցի մտահոգութիւններուն եւ Սուրիոյ քրիստոնեայ փոքրամասնութիւններու` ներառեալ եւ հայ համայնքի անվտանգութեան կարեւորութեան մասին:

 Թոթահ նաեւ հնարաւորութիւն ունեցած է զրուցելու  նախագահ Պիլ Գլինթընի օրով Սպիտակ տան աշխատակազմի նախկին ղեկավար Ճոն Փոտեսդայի, Մերիլանտի նահանգի ծերակուտական Ճէյմս Ռոսափեփէի եւ քոնկրէսական Հոյերի աշխատակազմի նախկին ղեկավար Թերի Լիերմանի հետ: «Ամերիկայի Հայկական Համագումարը պիտի շարունակէ ջանքեր գործադրել հայ ժողովուրդի բարօրութեան եւ յառաջխաղացման համար: Ես կ’ուզեմ Գոնկրէսի մեր շատ ընկերներու շնորհակալութիւն յայտնել եւ գիտեմ, որ շարունակելով մեր այս կարեւորագոյն աշխատանքը` մենք պիտի հասնինք մեր նպատակներուն եւ ձգտումներուն»,- նշած է Թոթահ:

 Ուաշինկթընի մէջ 1972-ին հիմնադրուած Ամերիկայի Հայկական Համագումարը ամենախոշոր կազմակերպութիւններէն է, որ կը խթանէ հայկական հարցերու հանրային իրազեկման:

LEAVE A REPLY

Please enter your comment!
Please enter your name here