Հունգարիոյ Մարդու Իրաւունքներու Պաշտպանը Կը Քննէ Սաֆարովի Գործը

0
157

Յաջորդ շաբաթ նախատեսուած է Հունգարիոյ հայ համայնքի հանդիպումը այդ երկրի մարդու իրաւունքներու պաշտպանին հետ` Ռամիլ Սաֆարովի գործով: Այս մասին, ըստ News.am-ի,  յայտնած է Հունգարիոյ հայկական ազգային ինքնավարութեան կազմակերպութեան փոխնախագահ Նիկողոս Յակոբեան:

Անոր խօսքով, ներկայիս Հունգարիոյ մարդու իրաւունքներու պաշտպանը կը քննէ Սաֆարովի գործը եւ կ’ուսումնասիրէ դատարան դիմելու նպատակայարմարութեան հարցը:

«Մենք շահագրգռուած ենք, որ մարդու իրաւունքներու պաշտպանը դատական գործընթաց նախաձեռնէ Սաֆարովի արտայանձնման օրինականութեան վերաբերեալ: Մեր հանդիպման իբրեւ արդիւնք` պարզ պիտի դառնայ, թէ ինչպէս պիտի զարգանան իրադարձութիւնները: Եթէ մարդու իրաւունքներու պաշտպանը այլ որոշում կայացնէ, այդ պարագային հայ համայնքի ներկայացուցիչները իրենք պիտի դիմեն դատարան»,- նշած է Նիկողոս Յակոբեան:

Յիշեցնենք, որ 2004 Փետրուար 19-ին Պուտափեշտի մէջ Ռամիլ Սաֆարովը քնացած ժամանակ կացինահարած էր հայ սպայ Գուրգէն Մարգարեանը, որուն համար 2006 Ապրիլ 13-ին Պուտափեշտի դատարանը անոր դատապարտած էր ցմահ ազատազրկման` առանց 30 տարի ներման իրաւունքի: Սպաները կը մասնակցէին ՆԱԹՕ-ի «Գործընկերութիւն յանուն խաղաղութեան» ծրագիրին ծիրէն ներս կազմակերպուած անգլերէն դասընթացներուն: Հայ միւս սպան սպաննելու ոճրագործին փորձը ձախողած էր:

Այս տարուան Օգոստոս 31-ին Հունգարիոյ կառավարութիւնը Սաֆարովը արտայանձնած էր Ատրպէյճանին, ուր անոր անյապաղ ազատ արձակած էին, մեծարած իբրեւ ազգային հերոս, կոչումը բարձրացուցած, բնակարան եւ նպաստ յատկացուցած: Նոյն օրը Հայաստանը յայտարարած էր Հունգարիոյ հետ դիւանագիտական յարաբերութիւնները կասեցնելու մասին:

Սաֆարովի գործին հետ կապուած Հայաստանի նախագահ Սերժ Սարգսեան իրաւասու մարմիններուն, այս պարագային` արդարադատութեան նախարարութեան հրահանգած էր ձեռնարկել բոլոր քայլերը` դատական միջազգային ատեաններ դիմելու համար:

LEAVE A REPLY

Please enter your comment!
Please enter your name here