Մորնինկսթար Առանց Թոյլտուութեան Պիտի Այցելէ Ջուղա

0
129

  Ամերիկայի Հայ Դատի յանձնախումբը (ANCA) կոչ ուղղած է Ատրպէյճանի մօտ Միացեալ Նահանգներու դեսպան Ռիչըրտ Մորնինկսթարին` անտեսելու Պաքուի արգելքը Ջուղայի հին հայկական գերեզմանոց այցելելուն վերաբերեալ: ANCA-ի գործադիր տնօրէն Արամ Համբարեանի խօսքով, Մորնինկսթար պէտք չէ առանց ուշադրութեան ձգէ այդ արգելքը: “Դեսպանը պէտք է այցելէ Ջուղա` առանց թոյլտուութիւն հարցնելու: Ամէն պարագայի մեզի համար եւ ամերիկացիներուն համար պարզ է, որ կարելի չէ սպառազինութիւն վաճառել Ատրպէյճանին, որ կը քանդէ գերեզմանոցները եւ թոյլ չի տար դեսպանին այցելելու մշակութային ժառանգութեան յուշարձանի ոչնչացուած վայր”,- ըսած է Համբարեան:

Դեսպան Ռիչըրտ Մորնինկսթար հանդէս եկած է յայտարարութեամբ` տարաշրջանին մէջ մշակութային ժառանգութեան պաշտպանութեան հարցով: Յայտարարութեան մէջ կը նշուի, որ Ատրպէյճանի մէջ նշանակուելէ ետք Մորնինկսթար սկսած է ծանօթանալ երկրի պատմութեան եւ մշակոյթին հետ: “Տարածաշրջանը բարդ պատմութիւն ունի, եւ ղարաբաղեան հակամարտութիւնը դարձած է հազարաւոր մարդոց մահուան պատճառ, լրջօրէն ազդած վայրերուն վրայ, որոնք ունին կրօնական եւ մշակութային կարեւոր ազդեցութիւն: Այցելելով Նախիջեւան, ես պաշտօնատար անձանց հետ քննարկած եմ Ջուղայի հին հայկական գերեզմանոցի քանդուելուն փաստը: Կ’ափսոսամ, որ պաշտօնական անձինք անհնար դարձուցած են այցելութիւնս այդ վայր` զայն պատճառաբանելով  անվտանգութեան հարցերով”,- կը նշուի անոր յայտարարութեան մէջ:

LEAVE A REPLY

Please enter your comment!
Please enter your name here