Հայաստան Շահագրգռուած է Պուլկարիոյ Հետ Յարաբերութիւններու Խորացումով. Սերժ Սարգսեան

0
160

  Հայաստանի նախագահ Սերժ Սարգսեան ընդունած է Պուլկարիոյ Հանրապետութեան հաշուիչ պալատի նախագահ Վալերի Տիմիդրովը: Այս մասին կը տեղեկացնեն ՀՀ նախագահի մամլոյ գրասենեակէն: Սերժ Սարգսեան ողջունած է հիւրը եւ ընդգծած, որ Հայաստանը մեծապէս շահագրգռուած է փոխադարձ հետաքրքրութիւն ներկայացնող բոլոր ոլորտներուն մէջ բարեկամ Պուլկարիոյ հետ յարաբերութիւններու խորացումով:

Երկու ժողովուրդներու վաղեմի բարեկամութիւնը, Հանրապետութեան ղեկավարի համոզմամբ, ամուր հիմք եւ նպաստաւոր պայմաններ ստեղծած միջպետական յարաբերութիւններու բնականոն զարգացման համար: Նախագահի խօսքով` Պուլկարիոյ հաշուիչ պալատի նախագահի այցը Հայաստանի վերահսկիչ պալատի հետ գործընկերային կապերը ամրապնդելու եւ համագործակցութիւնը ընդլայնելու փոխադարձ պատրաստակամութեան վկայութիւնն է, որ կարեւոր է նաեւ միջպետական յարաբերութիւններու զարգացման տեսանկիւնէն:

Հանրապետութեան նախագահը եւրոմերձեցման ճանապարհը ընտրած Հայաստանի համար կարեւոր համարած է նաեւ ԵՄ անդամ Պուլկարիոյ հետ բարեփոխումներու իրականացման գործին մէջ փորձի փոխանակումը:

Պուլկարիոյ հաշուիչ պալատի նախագահը նշած է, որ այցին ծիրէն ներս կը նախատեսէ Հայաստանի վերահսկիչ պալատի իր գործընկերոջ հետ երկու երկիրներու բարձրագոյն վերահսկիչ կառոյցներու միջեւ համագործակցութեան վերաբերեալ փաստաթուղթ ստորագրել, որ աւելի պիտի ամրապնդէ երկկողմ կապերն ու համագործակցութեան յետագայ ընդլայնման հիմք պիտի դառնայ: Վալերի Տիմիդրով մեծագոյն յարգանքով խօսած է երկու ժողովուրդներու բարեկամութեան ամրապնդման գործին մէջ զգալի դերակատարութիւն ունեցող պուլկարահայ համայնքի մասին, որ անոր խօսքով, իր նշանակալի աւանդը ունի նաեւ Պուլկարիոյ մշակութային, տնտեսական ու հասարակական-քաղաքական կեանքին մէջ:

LEAVE A REPLY

Please enter your comment!
Please enter your name here