ՀՀ Փոխվարչապետը Իրաքի Մէջ Հանդիպած է Հայ Համայնքի Ներկայացուցիչներու Հետ

0
104

Հայաստանի փոխվարչապետ, Տնտեսական համագործակցութեան հարցերով հայ-իրաքեան միջկառավարական համատեղ յանձնաժողովի համանախագահ Արմէն Գէորգեանի գլխաւորած պատուիրակութիւնը Իրաքի Հանրապետութիւն այցը Նոյեմբեր 6-ի երեկոյեան սկսած է հայ համայնքի ներկայացուցիչներու հետ հանդիպումով: Այս մասին կը յայտնեն ՏԿՆ հասարակայնութեան հետ կապերու բաժինէն:

Պատուիրակութեան կազմին մէջ են ՀՀ առողջապահութեան  նախարար Դ. Տումանեան, գիւղատնտեսութեան նախարար Ս. Կարապետեան, արտաքին գործերու, տնտեսութեան, ուժանիւթի եւ բնական պաշարներու փոխնախարարները, պաշտօնատար այլ անձինք: Մինչ հանդիպումը փոխվարչապետը եւ պատուիրակութեան միւս անդամները ծաղիկներ դրած են Պաղտատի Սբ Գրիգոր Լուսաւորիչ առաջնորդանիստ եկեղեցւոյ բակին մէջ Հայոց Ցեղասպանութեան զոհերու յիշատակը յաւէրժացնող խաչքարին:

Եկեղեցւոյ մէջ կայացած հանդիպման ներկայ եղած են Ազգային կեդրոնական վարչութեան, համայնքին մէջ գործող ազգային կազմակերպութիւններու անդամներ: Իրաքի հայոց թեմի առաջնորդ Աւագ արքեպիսկոպոս Ասատուրեան ողջունած է  Հայաստանի պաշտօնական պատուիրակութեան այցը Իրաք` նկատելով, որ վերջին տարիներուն ընթացքին ասիկա հայրենիքէն մեկնած առաջին նման պատուիրակութիւնն է եւ նշելով, որ այդ այցերը կ’ոգեշնչեն համայնքը:

Փոխվարչապետը ողջունած է ներկաները` ընդգծելով, որ Իրաքի հայ համայնքը պատմութիւն եւ աւանդոյթներ ունեցող այն գաղթօճախներէն է, որ իր գոյութեան ընթացքին անցած է բազմաթիւ փորձութիւններու մէջէն: «Գիտենք,  թէ ինչպիսի դժուարութիւնների միջով է անցել իրաքահայ համայնքը վերջին տարիներին: Յուսով եմ, որ այդ ամէնն արդէն անցեալում է, եւ հայ համայնքն արագ կը վերականգնի ուժերը ու իր նպաստը կ’ունենայ երկու երկրների յարաբերութիւնների զարգացմանը»,- ըսած է փոխվարչապետը:

Արմէն Գէորգեան գնահատելի համարած է համայնքի եւ համայնքային կազմակերպութիւններու աշխատանքն ու դերը ազգային հոգեւոր եւ մշակութային արժէքներու պահպանութեան գործին մէջ: Փոխվարչապետը վստահեցուցած է, որ Հայաստանը մշտապէս պիտի ըլլայ սփիւռքահայ հայրենակիցներու կողքին` նշելով, որ ՀՀ սփիւռքի նախարարութեան ստեղծումը սփիւռքի հայրենակիցներու խնդիրներուն աւելի մեծ ուշադրութիւն դարձնելու, հայրենիք-սփիւռք յարաբերութիւններուն աւելի համակարգուած բնոյթ հաղորդելու նպատակ ունէր, եւ վերջին տարիներուն այդ ուղղութեամբ կ’իրականացուի լուրջ աշխատանք: Հանդիպման ընթացքին քննարկուած են համայնքային կեանքին, Իրաքի ներքին իրավիճակին, համայնքը յուզող խնդիրներուն վերաբերող հարցեր:

Երեկոյեան փոխվարչապետի գլխաւորած պատուիրակութիւնը մասնակցած է Իրաքի փոխվարչապետ Ռոշ Նուրի Շուայեսի անունով պաշտօնական ընդունելութեան: Հանդիպման ընթացքին երկու երկիրներու փոխվարչապետները քննարկած են  միջկառավարական յանձնաժողովի առաջին նիստի օրակարգին, ինչպէս նաեւ երկկողմ յարաբերութիւններու խորացման առնչուող հարցեր:

LEAVE A REPLY

Please enter your comment!
Please enter your name here