Ճոն Հեֆըրն Հայաստանի Համար Նպաստաւոր Կը Համարէ Օպամայի Վերընտրուիլը

0
140

  ԱՄՆ նախագահի ընտրութիւնները իսկապէս հետաքրքրական, գաղափարական ընտրարշաւ էին: Ըստ Armenpress.am-ի` Նոյեմբեր 7-ին լրագրողներու հետ զրոյցի մը ընթացքին նման դիտարկում ըրած է Հայաստանի մօտ Միացեալ Նահանգներու արտակարգ եւ լիազօր դեսպան Ճոն Հեֆըրն:

«Երջանիկ եղայ մասնակից ըլլալու այս գործընթացին, պայքարը իրական էր, լուրջ, քանի որ երկու զօրաւոր, տարբեր ճանապարհներ անցած թեկնածուներ` ունեցան գաղափարներու մրցոյթ»,- ըսած է Հեֆըրն: Անոր խօսքով` ընտրութիւններուն արտացոլուեցան քաղաքական երկու ուժերու տարբեր փիլիսոփայութիւններ:

«Յոյս ունիմ, որ Հայաստանի մէջ Փետրուարին կայանալիք նախագահական ընտրութիւններն ալ այսպէս պիտի ընթանան”,- ընդգծած է Հեֆըրն:  Ան կարծիք յայտնեց, որ Ամերիկայի մէջ իրականութեան մէջ կարեւոր չէ այն, թէ ով ես, ուրկէ ես, ուր կ’ապրիս, որքան դրամ ունիս, «եթէ կ’աշխատիս եռանդուն կերպով, հնարաւորութիւն պիտի ունենաս յաջողութեան հասնելու»:

«Այս պատգամը մենք պէտք է ուղարկենք ամբողջ աշխարհին, մեր ուժի աղբիւրը մեր ցեղական, մշակութային բազմազանութեան մէջ է, բազմազանութիւնը ուժի աղբիւր է բոլոր պետութիւններուն համար»,- աւելցուցած է դիւանագէտը:

Դեսպանը շեշտած է, որ Օպամայի վարչակազմը եւ պետական քարտուղար Հիլարի Գլինթընը մեծ ուշադրութիւն կը դարձնեն  Հայաստանին եւ Հարաւային Կովկասին: Հեֆըրն ընդգծած է, որ իր պաշտօնավարման ընթացքին պետական քարտուղար Գլինթընը երկու անգամ այցելած է Հայաստան, եւ ատիկա այն պարագային, երբ 18 տարի շարունակ ոչ մէկ քարտուղար չէր եկած Հայաստան:

«Նախագահ Օպաման ՌԴ նախագահի հետ աշխոյժօրէն ներգրաւուած եղած է Մինսկի խումբի գործընթացին` Լեռնային Ղարաբաղի կարգաւորման գործով, եւ կը կարծեմ` պաշտօնավարման ընթացքին այս ամէնը պիտի շարունակուին»,- ըսած է դեսպանը: Ան նշած է, որ յատկապէս պիտի փափաքէր փոփոխութիւններ տեսնել հայ-ամերիկեան տնտեսական յարաբերութիւններու ոլորտին մէջ:

«Նոր աշխատատեղերու ստեղծումը շատ կարեւոր է մեր երկու երկիրներուն համար, ես պիտի փորձեմ ամէն ինչ ընել Միացեալ Նահանգներէն աւելի շատ ներդրումներ, աւելի մեծ առեւտրային ծաւալներ ապահովելու ուղղութեամբ»,- ըսած է դիւանագէտը: Ան նաեւ աւելցուցած է, որ Հայաստանի գործարար յարաբերութիւններու բարելաւումը, անկախ դատական համակարգը, ազատ տնտեսական մրցակցութիւնը պիտի նպաստեն աւելի մեծ ծաւալի ամերիկեան ներդրումներ ապահովելու համար:

«Հիմնական փոփոխութիւնը պիտի ըլլայ, իմ կարծիքով, աշխատատատեղերու թիւի յաւելումը»,- նշած է Հեֆըրն:

Անդրադառնալով հայ-թրքական յարաբերութիւններուն` ան նշած է, որ արձանագրութիւններու վաւերացումը եւ իրականացումը գերակայ խնդիր եղած է ԱՄՆ-ի համար 2009-էն ի վեր:

«Վարչապետ Էրտողանի հետ բոլոր հանդիպումներուն ժամանակ Օպաման բարձրացուցած է այս հարցը: Յունիսին Գլինթըն շատ յստակ ըսաւ, որ գնդակը կը գտնուի Թուրքիոյ խաղադաշտին մէջ, հակառակ անոր, որ յառաջընթացի բացակայութիւնը յուսախաբ կ’ընէ  ԱՄՆ-ն, սակայն մենք մեր ջանքերը այս ուղղութեամբ մէկ կողմ պիտի չձգենք»,- ըսած է  Հայաստանի մէջ ԱՄՆ դեսպանը: Ան ողջունած է ՀՀ նախագահ Սերժ Սարգսեանի կողմէ հայ-թրքական արձանագրութիւնները արտաքին օրակարգի վրայ պահելու հանգամանքը:

Հեֆըրնի կարծիքով` նախագահ Օպամայի պաշտօնավարման երկրորդ շրջանին աւելի մեծ քայլեր պիտի իրականանան հայ-թրքական արձանագրութիւնները կեանքի կոչելու ուղղութեամբ:

2013 Փետրուարին Հայաստանի մէջ կայանալիք նախագահական ընտրութիւններուն դեսպանը կ’ակնկալէ քաղաքական բոլոր ուժերու աշխոյժ պայքարը: Ան յոյսով է, որ ընտրութիւններու աւարտը պիտի ըլլայ դրական թէ’ գործող նախագահի, թէ’ ՀՀԿ-ի, թէ’ ընդհանուր մրցապայքարի համար:

LEAVE A REPLY

Please enter your comment!
Please enter your name here