ՄԱԿ-ի Մօտ Հայաստանի Դեսպանը Խօսած Է Պաշտօնական Պաքուի Հայատեաց Քաղաքականութեան Մասին

0
147

Տակաւին Ղարաբաղի հանդէպ Ատրպէյճանի սանձազերծած թշնամական յարձակումներուն վէրքերը չսպիացած, այդ երկիրը կը շարունակէ պետական մակարդակով քարոզել ատելութիւն հայերու նկատմամբ:  Այդ մասին յայտարարած է ՄԱԿ-ի մօտ Հայաստանի մշտական ներկայացուցիչ, դեսպան Կարէն Նազարեան`  երէկ ՄԱԿ-ի Գլխաւոր Խորհուրդի 67-րդ նստաշրջանի ծիրէն ներս ելոյթ ունենալով օրակարգի «Ռասիզմի, ռասայական խտրականութեան ու անհանդուրժողականութեան այլ ձեւերուի վերացում» կէտով:

Հայաստանի արտաքին գործոց նախարարութեան մամուլի եւ տեղեկատուութեան վարչութեան փոխանցումով, դեսպանը նիստին մասնակցող ՄԱԿ-ի անդամ երկիրներու ուշադրութեան յանձնած է պաշտօնական Պաքուի հայատեացութեան փաստերը` նշելով, որ այս առթիւ կ’ահազանգէ ամբողջ միջազգային հանրութիւնը, մասնաւորապէս, ռասիզմի դէմ պայքար մղող միջկառավարական կառոյցները:

Նազարեանի ելոյթին առանցքային թեման մարդասպան Ռամիլի Սաֆարովին ներում շնորհելն էր, որ ոչ միայն կը հակասէ միջազգային իրաւունքի մարդասիրական նպատակներուն, այլեւ մարտահրաւէր կը նետէ մարդու իրաւունքներու ամբողջ համակարգին:

Դեսպանը նշած է, որ Ատրպէյճանի նախագահին կողմէ մարդասպանին ներումը անպատժելիութեան սարսափելի օրինակ է, էթնիկ հողի վրայ կատարուած յանցագործութեան շարունակութիւն, որ հետեւանք է Ատրպէյճանի մէջ տասնամեակներ իրականացուող այլատեացութեան եւ ռասիստական քաղաքականութեան: Ան աւելցուցած է, որ Ատրպէյճանը կոպտօրէն կ’ոտնահարէ «հանդուրժողականութիւն ցուցաբերելու, իբրեւ բարի դրացիներ խաղաղութեան մէջ համատեղ ապրելու» ՄԱԿ-ի նպատակը եւ այսպիսով կը խափանէ վստահութեան մթնոլորտի ձեւաւորման գործընթացը տարածաշրջանին մէջ:

Կարէն Նազարեան ՄԱԿ-ին եւ միջազգային հանրութեան կոչ ըրած է ` շարունակելու բողոքի ձայն բարձրացնել ընդդէմ այս աններելի վարքագիծին, որ, անարգելով մարդու իրաւունքներն ու արժանապատուութիւնը, կը վտանգէ նաեւ տարածաշրջանային խաղաղութիւնն  ու անվտանգութիւնը:

LEAVE A REPLY

Please enter your comment!
Please enter your name here