Հայաստանի եւ Իրաքի Կառավարութիւններու Միջեւ Ներդրումներու Խրախուսման Մասին Համաձայնագիր Ստորագրուած Է

0
142

 ՀՀ փոխվարչապետ, Տնտեսական համագործակցութեան հարցերով  հայ-իրաքեան միջկառավարական համատեղ յանձնաժողովի համանախագահ Արմէն Գէորգեանի եւ Իրաքի խորհրդարանի առաջին փոխնախագահ Քուսէյ ալ Սիհաիլիի` Նոյեմբեր 8-ին Պաղտատի մէջ կայացած հանդիպման ընթացքին քննարկուած են խորհրդարանական կապերու աշխուժացման, միջազգային կազմակերպութիւններու ծիրէն ներս համագործակցութեան հարցեր:

Այս մասին՝ ըստ «Արմենփրես»-ի՝ կը տեղեկացնէ ՏԿՆ հասարակայնութեան հետ կապերու բաժինը: Գէորգեան իրաքեան կողմին փոխանցած է Հայաստանի ԱԺ նախագահի բարեմաղթանքները: Փոխվարչապետը նշած է երկու երկիրներու խորհրդարաններուն միջեւ աւանդական բարեկամական կապերու մասին` բարձր գնահատելով  յարաբերութիւններու զարգացման եւ ամրապնդման գործով  խորհրդարանական համագործակցութեան դերը:

Քուսէյ ալ Սիհաիլի իր հերթին նշած է յարաբերութիւնները զարգացնելու իրաքեան կողմի շահագրգռուածութիւնը` տեղեկացնելով, որ յառաջիկային պիտի ձեւաւորուի իրաքա-հայկական խորհրդարանական բարեկամութեան խումբը, որ իր գործունէութեամբ պիտի նպաստէ միջխորհրդարանական յարաբերութիւններու աշխուժացման: Ան աւելացուցած է, որ ոչինչ կը խանգարէ բարեկամ հայ ժողովուրդի հետ  կապերը խորացնելուն:

Խորհրդարանի փոխնախագահը նաեւ ջերմութեամբ խօսած է իրաքահայ համայնքին մասին` նկատելով, որ երկրին մէջ ամէնուր նկատելի է հայերու հետքը: Ան նշած է հայ համայնքի դրական դերը երկրի շարք մը ոլորտներու զարգացման գործին` ընդգծելով, որ Իրաքի ժողովուրդը բարձր կը գնահատէ հայերու հետ ունեցած դարաւոր բարեկամութիւնը:

Երկուստէք համոզում յայտնուած է նաեւ, որ խորհրդարանական դիւանագիտութիւնը կարեւոր օղակ կրնայ հանդիսանալ յարաբերութիւններուն նոր թափ հաղորդելու համար: Կողմերը մտքեր փոխանակած են Իրաքի կողմէ իրականացուող քաղաքականութեան վերաբերեալ:

Պաղտատի մէջ տեղի ունեցաւ  նաեւ տնտեսական համագործակցութեան հարցերով  հայ-իրաքեան միջկառավարական համատեղ յանձնաժողովի նիստին համաձայնեցուած փաստաթուղթերու ստորագրման պաշտօնական արարողութիւնը: Միջկառավարական յանձնաժողովի համանախագահներ` ՀՀ փոխվարչապետ, տարածքային կառավարման նախարար Արմէն Գէորգեան եւ ԻՀ  փոխվարչապետ Ռոշ Նուրի Շաուէյսն ստորագրած են նիստի արձանագրութիւնը, երկու երկիրներու կառավարութիւններուն միջեւ ստորագրուած է նաեւ «Հայաստանի Հանրապետութեան եւ Իրաքի Հանրապետութեան միջեւ ներդրումներու խրախուսման եւ փոխադարձ պաշտպանութեան  մասին» համաձայնագիրը:

Պաղտատէն փոխվարչապետը մեկնած է Սուլէյմանիա, ուր կը նախատեսուի անոր հանդիպումը Իրաքի Հանրապետութեան նախագահ Ճալալ Թալապանիի հետ:

LEAVE A REPLY

Please enter your comment!
Please enter your name here