Պարոնուհի Քերոլայն Քոքս Ատրպէյճանը Մերկացնող Ելոյթ Ունեցած Է

0
156

  Մեծ Բրիտանիոյ Լորտերու պալատի անդամ, հայ-բրիտանական խորհրդարանական խումբի ղեկավար պարոնուհի Քերոլայն Քոքս Ատրպէյճանը մերկացնող ելոյթ ունեցած է Միացեալ Թագաւորութեան եւ Ատրպէյճանի միջեւ յարաբերութիւններու մասին բանավէճի ժամանակ: Այս մասին կը հաղորդէ Asbarez-ը: Քոքս նշած է, որ» այդ քննարկման իր «ներդրումը» բացասական պիտի ըլլայ, քանի որ իր ելոյթը Ատրպէյճանի դէմ ուղղուած քննադատութիւն է: «Սակայն այն ինչ պիտի ըսեմ, տեղեկութիւն եւ վկայութիւն է նոյնինքն առաջին ձեռքէն: Տարածաշրջան այցելած եմ 78 անգամ, այցերուս շատերը եղած են ղարաբաղեան պատերազմի ընթացքին: Ես 1991-ին այցելած եմ Ատրպէյճան, ուր հանդիպեցայ նախագահի եւ քաղաքական գործիչներու հետ: Ես զարմացած էի հայերու բացայայտ էթնիկ զտումներու փաստով: Ես նաեւ Լեռնային Ղարաբաղ այցելեցի եւ հանդիպեցայ ատրպէյճանցիներու, որոնք կ’ապրէին տուներու մէջ, որոնք պատակնած են այն հայերուն, որոնք վտարուած էին Ատրպէյճանի լաւ մշակուած փաստաթղթային քաղաքականութեան արդիւնքով: «Օղակ» գործողութեան ծրագրի ծիրէն ներս ատրպէյճանական զօրքը շրջապատած էր հայ գիւղացիները, որոնք սպաննեց, խոշտանգեց եւ քշեց իրենց հողէն»,-նշած է Քոքս:

Բրիտանացի գործիչը նաեւ շեշտած է, որ Ատրպէյճանի մէջ հայերը մշտապէս զոհ եղած են եւ օրինակ բերած է Սումկայիթի եւ Պաքուի ջարդերը: «Ես եղած եմ ատրպէյճանցիներու կողմէ նախապատրաստուած պատերազմական յանցագործութիւններու վկան, որոնցմէ մէկը Մարաղայի գիւղացիներու կոտորածն է: Ես այնտեղ տեսած եմ կտրուած գլուխներով դիակներ: Այցելած եմ նաեւ Խոջալու, եւ կը վկայեմ, որ այնտեղ իրականացուած դաժան եւ ողբերգական դէպքերը չեն համապատասխաներ Ատրպէյճանի ներկայացրածին: Այս հարցին առնչութեամբ անկախ լրագրողներ եւ Ատրպէյճանի նախկին նախագահ Մութալիպով եւս համակարծիք են»,-շեշտած է Քոքս:

Պարոնուհին այն եզրահանգման եկած է, որ Ատրպէյճանի եւ Հայաստանի ժողովուրդները անյապաղ խաղաղութեան հաստատման կարիք ունին, «քանի որ Հարաւային Կովկասի ժողովուրդը չի  ցանկանար տարածաշրջանը ապակայունացնող մէկ այլ պատերազմ: «Սակայն Ատրպէյճանի շարունակական թշնամական քաղաքականութիւնը կը վտանգէ այս կիսասառեցուած հակամարտութեան խաղաղ լուծում տալու փորձերը»,-ընդգծած է ան:

Քերոլայն Քոքս իր ելութին մէջ նաեւ անդրադարձած է Ռամիլ Սաֆարովի գործին` մէջբերելով Ռուսաստանի եւ ԱՄՆ-ի արձագանգը «սաֆարովեան» գործարքին վերաբերեալ: «Իսկ կրնամ հարցնել` ի՞նչ քայլեր ձեռնարկած է կամ ինչպէ՞ս արձագանգած է Մեծ Բրիտանիան ոճրագործ Սաֆարովի հերոսացման եւ ազատ արձակման վերաբերեալ»,-հարց բարձրացուցած է Քոքս:

Լորտերու պալատի անդամը խօսած է նաեւ Ատրպէյճանի մէջ մարդու իրաւունքներու շուրջ տիրող իրավիճակին, մասնաւորապէս` մամուլի եւ կրօնի ազատութեան մասին:

LEAVE A REPLY

Please enter your comment!
Please enter your name here