Ֆրանսահայերը Կ’աշխատին Ցեղասպանութեան Ժխտումը Քրէականացնող Օրինագիծը Ծերակոյտին Ներկայացնելու Ուղղութեամբ

0
130

  Ֆրանսայի հայ համայնքը կը շարունակէ աշխատանքներ տանիլ Հայոց Ցեղասպանութեան ժխտումը քրէականացնող նոր օրէնքի նախագիծի` Ծերակոյտին ներկայացուելու ուղղութեամբ, եւ ՀՀ նախագահ Սերժ Սարգսեանի այցելութիւնը Փարիզ այս առումով կրնայ որոշակիօրէն նպաստել այս գործընթացին: Այս մասին կը հաղորդէ Armenpress.am-ը` զրուցելով Փարիզի Հայ Դատի գրասենեակի ղեկավար Հրաչ Վարժապետեանի հետ:

 Հայաստանի եւ Ֆրանսայի նախագահներու հանդիպման, բնականաբար, պիտի քննարկուին նաեւ օրինագիծին հետ կապուած հարցերը եւ հայ համայնքին վերաբերող խնդիրները: Գրասենեակի ղեկավարին խօսքով` նախագահներ Սերժ Սարգսեանի եւ Ֆրանսուա Հոլանտի` նախագահական նստավայրին մէջ յառաջիկային կայանալիք հանդիպման պիտի յաջորդեն այցելութիւններ, ինչպէս նաեւ հանդիպումներ Ծերակոյտին հետ: Ելիսէյեան պալատին մէջ կազմակերպուելիք ճաշկերոյթին հրաւիրուած են նաեւ հայ համայնքի որոշ ներկայացուցիչներ եւ պատասխանատուներ, ինչպէս` Հրաչ Վարժապետեանը:

Ֆրանսայի Հայկական կազմակերպութիւններու համակարգող խորհուրդի համանախագահ Արա Թորանեան, իր հերթին, նշած էր, որ Ֆրանսայի Ազգային Ժողովի սոցիալիստներու կուսակցութեան նախագահ Պրիւնօ Լէ Ռուն իրենց պատուիրակութեան համանախագահներուն հետ հանդիպման ընթացքին վերահաստատած է կուսակցութեան` Հայոց Ցեղասպանութեան ժխտումը քրէականացնող օրինագիծի ընդունման մտադրութիւնը: Լէ Ռու նշած է, որ իրենց սկզբունքներուն մէջ ոչինչ փոխուած է. Ֆրանսայի նախագահ Ֆրանսուա Հոլանտը պէտք է յարգէ իր տուած խոստումը, եւ Հայոց Ցեղասպանութեան ժխտումը քրէականացնող նոր օրէնքի նախագիծ իրենք պիտի առաջարկեն Ապրիլ 24-ին ընդառաջ:

 Նշենք, որ Ֆրանսայի Ազգային ժողովը 22 Դեկտեմբեր 2011-ին, իսկ Ծերակոյտը` 24 Յունուար 2012-ին ընդունեցին Հայոց Ցեղասպանութեան ժխտման պատժելիութեան օրինագիծը, որ նախագահ Նիքոլա Սարքոզիի վաւերացման ներկայացուելէ առաջ խումբ մը թրքամէտ պատգամաւորներու ջանքերով ներկայացուեցաւ Սահմանադրական դատարան եւ համարուեցաւ հակասահմանադրական:

LEAVE A REPLY

Please enter your comment!
Please enter your name here