ԵԱՀԿ Համանախագահները Նոյեմբերի Վերջը Տարածաշրջան Պիտի Այցելեն

0
109

  ԼՂ խնդրի կարգաւորմամբ զբաղող ԵԱՀԿ Մինսքի խումբի համանախագահներ Ռոպերթ Պրատգէն (ԱՄՆ), Իկոր Փոփովը (Ռուսաստան), Ժաք Ֆորը (Ռուսաստան) եւ ԵԱՀԿ գործող նախագահի անձնական ներկայացուցիչ Անճէյ Գասպրչիքը նախօրէին Վիեննայի մէջ կազմակերպութեան մշտական խորհուրդին ներկայացուցած են իրենց տարեկան զեկոյցը: Այս մասին կը տեղեկանանք ԵԱՀԿ պաշտօնական կայքէջէն:

Համանախագահները ընդգծած են վերջին մէկ տարուան ընթացքին իրենց կողմէ իրականցուցած աշխոյժ աշխատանքը, ներառեալ առանձին ու միասին հանդիպումները հակամարտող երկիրներու ղեկավարներու հետ, ինչպէս նաեւ Հայաստանի, Ռուսաստանի, Ատրպէյճանի նախագահներու մասնակցութեամբ այս տարուան Յունուարին Սոչիի մէջ տեղի ունեցած եռակողմ հանդիպումը:

Համանախագահները հակիրճ ներկայացուցած են իրենց դերակատարութիւնը` տարածաշրջանին մէջ դեսպան Գասպրչիքի ու անոր խումբի աշխատանքներու միջոցով կողմերուն միջեւ լարծաւութիւնը յաղթահարելու եւ հրադադարի խախտման պարագային թէժացումը կանխելու հարցով:

Մշտական խորհուրդին զեկոյցը ներկայացնելէ զատ, համանախագահները հանդիպում ունեցած են Մինսքի խումբի ծիրէն ներս: Հանդիպումներ տեղի ունեցած են նաեւ յաջորդ տարի ԵԱՀԿ նախագահութիւնը ստանձնող Ուքրանիոյ եւ Զուիցերիոյ պատուիրակութիւններուն հետ:

Հաղորդագրութեան համաձայն, Դեկտեմբերին Տապլինի մէջ կայանլիք նախարարական հանդիպումէն առաջ, համանախագահները այս ամսուան վերջը կրկին պիտի այցելեն տարածաշրջան:

 

LEAVE A REPLY

Please enter your comment!
Please enter your name here