Կուրճիեւի Անուան Նուագախումբին Մեծ Յաղթանակը` EDISON AWARD Մրցանակաբաշխութեան

0
287

  Կուրճիեւի անուան ժողովրդական նուագարաններու խումբին ձայնասկաւառակը այս տարուան  Հոկտեմբերին առաջադրուած է աշխարհի ամենահեղինակաւոր մրցանակաբաշխութիւններէն մէկուն`  հոլանդական «Edison Award» –ի «լաւագոյն ժողովրդական ալպոմ» անուանակարգին եւ Նոյեմբեր 5-ին ճանչուած` անուանակարգի յաղթող երաժշտական նախագիծ:

Մրցանակը աննախադէպ յաղթանակ է, քանի որ «Edison Award»-ը կը հանդիսանայ աշխարհի 4 ամէնէն հեղինակաւոր մրցանակաբաշխութիւններէն մէկը եւ իր հեղինակութեամբ ու կարեւորութեամբ կը համեմատուի ամերիկեան «Grammy Award», գերմանական «Preis der Schallplayyenkritik» եւ Ֆրանսական «Victoire» երաժշտական մրցանակաբաշխութիւններու հետ: Այս մասին կը վկայէ թէկուզ այն փաստը, որ 1960 թուականին ստեղծուած այդ մրցանակաբաշխութեան պատուոյ կոչումներուն արժանացած են այնպիսի հեղինակաւոր ստեղծագործողներ, ինչպիսիք են՝ համաշխարհային երաժշտարուեսի պսակ հանդիսացող արուեստագէտներ Շառլ Ազնաւուր, Մայքլ Տէյվիս, Էմիլոու Հարրիս, Էրիք Քլեփթըն, Պոպ Ճէյմս, Ֆիլ Քոլինս, Ռայ Քուտըր, Սթիւի Ուանտըր, Ռոպի Ուլիըմզ, Վալերի Կերկիեւ, Եւկենի Կիսին, Կլաուտիօ Արաու, Փիեռ Պուլէզ եւ ուրիշներ: Մրցանակաբաշխութիւնը կ’առաջնորդուի ամենաբարձր չափանիշներով` մրցանակներ շնորհելով միայն «բացառիկ արժէք ներկայացնող ձայնասկաւառակ»-ներու:

Մրցանակաբաշխութիւնը այս տարի տեղի պիտի ունենայ Նոյեմբեր 28-ին, Հոլանտայի Այնտհովըն քաղաքի Ֆիլիփս համերգասրահին մէջ, ուր ալ մրցանակը պիտի յանձնուի Կուրճիեւի անուան ժողովրդական նուագարաններու համոյթի հիմնադիր եւ գեղարուեստական ղեկավար Լեւոն Էսկենեանին:

Յաղթանակած ձայնասկաւառակը, որ կը ներկայացնէ  հայազգի փիլիսոփայ, երաժիշտ, պարուսոյց, գրող Գ. Ի. Կիւրճիեւի երաժշտութեան ժողովրդական գործիքներու համար կատարուած մշակումներ, թողարկուած է Յուլիս 2011-ին` գերմանական հեղինակաւոր «ECM Records» ընկերութեան կողմէ:

Էտիսընի մրցանակը հրատարակութեան միակ յաջողութիւնը չէ, քանզի թողարկման օրուընէ ան բազմիցս արժանացած է տարբեր մրցանակներու, երաժշտական աշխարհի ջերմ ընդունելութեան, ինչպէս նաեւ համաշխարհային մամուլի ամենաբարձր գնահատանքին:

Այսպէս, 2012 թուականին Հայաստանի «Ազգային երաժշտական մրցանակաբաշխութեան» ալպոմը ճանչուեցաւ իբրեւ տարուան լաւագոյն ժողովրդական ալպոմ, իսկ հրատարակութեան մասին ակնարկներ եւ յօդուածներ յայտնուեցան այնպիսի հեղինակաւոր պարբերականներու էջերուն մէջ, ինչպիսիք են «BBC Music Magazine»-ը, «The Guardian»-ը, «The Financial Times»-ը, «The Independent»-ը, «USA National Public Radio»-ն, «NPR Music»-ը, «Mitteldeutsche Zeitung»-ը, «L’Unita»-ն, «LA LIBERT»-ն, «The Wire»-ը: Աւելին, Աւստրալիոյ պետական ձայնասփիւռը` «ABC» –ն, Սեպտեմբեր 2011-ին ձայնասկաւառակը ճանչցաւ շաբաթուան լաւագոյն ալպոմ, իսկ Յունուար 2012-ին ամերիկեան «Q2»  դասական երաժշտութեան ռատիօ ընկերութիւնը զայն անուանեց շաբաթուան լաւագոյն  CD-ալպոմ:

Ձայնասկաւառակին մէջ Կուրճիեւի մեղեդիները կը հնչեն կատարումով Կուրճիեւի անուան ժողովրդական նուագարաններու խումբին, որ հիմնադրուած է 2008-ին Լեւոն Իսկէնէանի կողմէ: Խումբին մէջ ընդգրկուած են Հայաստանի լաւագոյն երիտասարդ կատարողներ: Անցեալ տարուան ընթացքին համոյթը բազմաթիւ ելոյթներով շրջագայած է աշխարհի տարբեր երկիրներով` հանդէս գալով Զուիցերիոյ, Իտալիոյ, Գերմանիոյ, Ռուսաստանի, Պելճիքայի, Լեհաստանի ամենահեղինակաւոր բեմահարթակներուն եւ փառատօններուն:

LEAVE A REPLY

Please enter your comment!
Please enter your name here