Հայ Մարմնամարզուհին Արժանացած է Կրկէսային Միջազգային Փառատօնի Յատուկ Մրցանակին

0
181

Հայաստանը ներկայացնող 16-ամեայ օդային մարմնամարզուհի Յասմիկ Մանուչարեան արժանացած է Մանկական եւ երիտասարդական կրկէսային հաւաքականներու, դպրոցներու եւ կատարողներու «Կրկէսային ապագայ» VI միջազգային փառատօնի «Հանդիսատեսներու համակրանք» յատուկ մրցանակին:

Փառատօնին, որ տեղի կ’ունեցած է Նոյեմբեր 4-ին Լուկանսկիի մէջ (Ուքրանիա), հայ մարմնամարզուհին հանդէս եկած է «օդային ռափոտիա» համարով:
Փառատօնին մասնակցած են կրկէսային 50 հաւաքականներ, որոնք կը ներկայացնէին Ուքրանիան, Ռուսաստանը, Պելառուսը, Լաթվիան, Լիթվան, Էսթոնաիան, Հոլանտան, Գերմանիան, Լեհաստանը, Ֆրանսան, Չեխիան, Զուիցերիան, ԱՄՆ-ը եւ, հասկանալի է, Հայաստանը:
Յասմիկ Մանուչարեանին մրցանակը յանձնած է Ուքրանիոյ կրկէսային արուեստի վաստակաւոր գործիչ, Լուկանսքի պետական կրկէսի տնօրէն Տմիթրի Կասիան:
Յասմիկ Մանուչարեան կ’ուսանի Երեւանի Լէոնիտ Ենգիպարեանի անուան կրկէսային դպրոցին մէջ, որուն ղեկավարը Նայիրա Պետրոսեանն է: Յասմիկ Մանուչարեան 8 տարեկանէն կ’իւրացնէ կրկէսային արուեստի գաղտնիքները: Իսկ կրկէսային ցուցադրութիւնը, որ ան նախապատրաստած է մարզիչ Գնէլ Սարգսեանի հետ համատեղ, անոր յաղթանակ պարգեւած է Երեւանի մէջ 2010 թուականին տեղի ունեցած Տելֆեան 6-րդ խաղերուն:
«Յասմիկ Մանուչարեանի յաղթանակը հնարաւորութիւն է տալիս նախաձեռնել նրա մասնակցութիւնը Մոնթէ Գարլոյի ամենաներկայացուցչական կրկէսի միջազգային փառատօնին` 2013 թուականին»,- ըսած է Երեւանի պետական կրկէսի գեղարուեստական ղեկավար Սօս Պետրոսեան:

 

LEAVE A REPLY

Please enter your comment!
Please enter your name here