Բանակն Ու Թուրքիոյ Պետութեան «Մութ Ուժեր»ը Սպանդներու Պատասխանատու Կը Նկատուին

0
124

 Քիւրտիստանի Աշխատաւորական Կուսակցութեան նախկին թիւ երկու անձնաւորութիւնը՝ Շեմտին Սաքըք, որ ներկայիս բանտարկուած է, այս շաբթուան ընթացքին շարք մը ցնցիչ մեղադրանքներ ուղղած է բանակին եւ «ընդյատակեայ պետութիւն» կոչուած ուժերուն։
«Էրկենեքոն»ի դատավարութեան ընթացքին Սաքըք նախապէս վկայութիւններ տուած էր իբրեւ «գաղտնի վկայ», սակայն Սաքըք աւելի ուշ որոշած է բացայայտօրէն կատարել իր վկայութիւնը: Ան ըսած է, թէ ինք «նախկին ահաբեկի»չ է, քանի որ Քիւրտիստանի Աշխատաւորական Կուսակցութեան հետ իր կապերը խզած է, երբ գիտակցած է, թէ զինեալ բախումները լուծում պիտի չբերեն քրտական հարցին։
Սաքըքի համաձայն՝ պետական «մութ ուժեր», որոնք «Էրկենեքոն»ի կազմակերպիչներն են, բազմաթիւ սպանդներ կազմակերպած ու ապա անոնց պատասխանատու համարած են քիւրտ անջատողականները: Սաքըքի վկայութիւններուն երկու գլխաւոր թիրախներն են «Էրկենեքոն»ի ձերբակալուած երկու անձեր, որոնցմէ մէկն է Բանուորական կուսակցութեան պետ Տողու Փերինչեք, իսկ միւսը՝ գրող ու քաղաքական գործիչ Եալչըն Քիւչիւք։
Սաքըք բազմաթիւ նշանաւոր անձերու սպանութեան պատասխանատու կը նկատէ զինուորականներ ու «Էրկենեքոն»ի այլ անդամներ: Ան հետաքրքրական պնդում մը ունի 1993-ի Մայիսին սպաննուած 33 զինուորներու հարցով: Ան կ՛ըսէ, որ այդ սպանդը գործադրած էին քիւրտերը, բայց բանակի զօրավարները գիտակցաբար դէպի մահ ղրկած էին զինուորները, որպէսզի այդ դէպքը շահագործեն քիւրտերու դէմ։ Ան նաեւ դրուատած է «Էրկենեքոն»ի ու «Լախտի հարուած» կոչուած շարժումի դատավարութիւնները եւ ըսած, թէ 13 տարի ետք, երբ բանտէն ազատ արձակուի, զինուորական ծառայութիւն պիտի մատուցէ, որպէսզի քիւրտ երիտասարդներուն ըսած ըլլայ, որ բանակը իրենց բանակն է եւ պէտք է զինուորական ծառայութեան գան՝ փոխանակ լեռ բարձրանալու։
Նախկին սպայակոյտի պետ զօր. Իլքեր Պաշպուղ եւ այլ հրամանատարներ արդէն իսկ խստօրէն մերժած են Սաքըքին վկայութիւնները՝ պնդելով, թէ «այս ահաբեկիչ»ի խօսքերուն նպատակը բանակը վարկաբեկելն է:

 

LEAVE A REPLY

Please enter your comment!
Please enter your name here