Իսրայէլեան Բանակը Զգուշացման Նպատակով Կրակ Բացած է Սուրիոյ Ուղղութեամբ

0
103

Իսրայէլեան բանակը երէկ զգուշացման նպատակով սուրիական հողամասերու ուղղութեամբ կրակ բացաւ, երբ Սուրիայէն արձակուած հրասանդի հրթիռ մը ինկաւ հիւսիսային Իսրայէլի վրայ:

Իսրայէլեան ձայնասփիւռի կայանը հաղորդեց, որ իսրայէլացի զինուորները հոկտեմբեր 1973-էն ի վեր իր տեսակին մէջ առաջինը եղող դէպքով մը սուրիական բանակին դիրքին մօտ եղող շրջանի մը ուղղութեամբ կրակ բացած են:

Իսրայէլեան բանակէն աղբիւր մը ԱՖՓ լրատու գործակալութեան յայտնեց, որ իսրայէլացի զինուորները դիտմամբ չեն հարուածած սուրիական բանակի դիրքը` աւելցնելով, որ իսրայէլեան բանակը հակադարձելու համար օգտագործած է հակահրասայլային համակարգ մը, որ թիրախը հարուածելու բարձր ճշգրտութիւն ունի:

Իսրայէլեան բանակը հաղորդագրութիւն մը հրապարակելով յայտնեց, որ «քիչ առաջ Կոլանի բարձունքին վրայ հրասանդի հրթիռ մը հարուածեց Սուրիա-Իսրայէլ սահմանին վրայ գտնուող իսրայէլեան բանակին պատկանող դիրք մը` Սուրիոյ մէջ ներքին տագնապի ընթացքին: Ի պատասխան իսրայէլացի զինուորները սուրիական շրջաններուն ուղղութեամբ զգուշացման նպատակով կրակ բացին»:

Իսրայէլ Կոլանի բարձունքներուն վրայ գտնուող ՄԱԿ-ի խաղաղապահ ուժերուն բողոքագիր մը ներկայացուց` զգուշացնելով, որ «Սուրիայէն Իսրայէլի ուղղութեամբ հրթիռներու արձակման նկատմամբ բարեացակամութիւն պիտի չցուցաբերուի եւ մեր պատասխանը խիստ պիտի ըլլայ»:

Իսրայէլի պաշտպանութեան նախարար Իհուտ Պարաք յայտնեց, որ Սուրիոյ նախագահ Պաշար Ասատին Իսրայէլի կողմէ փոխանցուած է պատգամ մը, թէ պէտք է վերջ տայ Կոլանի մօտ ընդդիմադիր զինեալներուն դէմ յարձակումներուն` նշելով, որ «եթէ սուրիական կողմէն հրթիռ մը իյնայ, պիտի հակադարձենք»:

 

 

LEAVE A REPLY

Please enter your comment!
Please enter your name here