Արցախեան Հերոսամարտի Մարտունեցի Զոհերուն Նուիրուած Յուշարձան

0
136

Գեղարքունիքի մարզի Մարտունի քաղաքին մէջ 11 Նոյեմբերին բացումը կատարուեցաւ Արցախեան ազատամարտի մարտունեցի զոհերուն նուիրուած յուշարձանին, զոր օծեց Հայ առաքելական եկեղեցւոյ Գեղարքունեաց թեմի առաջնորդ Մարկոս եպս. Յովհաննիսեանը: Արցախեան ազատամարտին ընթացքին Հայաստանի Մարտունիի վարչական շրջանը տուաւ աւելի քան 100 զոհ եւ 150 վիրաւոր, որոնց կարգին՝ 10 զոհ, 2 անյայտ կորած եւ 30 վիրաւոր Մարտունի քաղաքէն: Բայց եւ այնպէս մինչեւ օրս Մարտունին չունէր Արցախեան ազատագրական պայքարին ընթացքին զոհուած մարտունեցիներուն յիշատակը եւ գոյամարտի խորհուրդը յաւերժացնող յուշարձան: Նման քայլի նախաձեռնեց Մարտունի քաղաքի բնակիչ, Հայաստանի նկարիչներու եւ քանդակագործներու միութեան անդամ Արամայիս Խլղաթեանը:
Անոր հրաւէրով Մարտունիի քանդակագործութեան սիմփոզիումին մասնակցեցան Հայաստանի նկարիչներու եւ քանդակագործներու միութեան անդամներ Ռաֆիկ Սարգսեանը, Արտիկ Քոչարեանը, Սամուէլ Մարտիրոսեանը, Գարեգին Դաւթեանը, Արմէն Վարդանեանը, որոնք Արամայիս Խլղաթեանի հետ հեղինակեցին վեց  բարձրարուեստ քանդակներ, որոնք խորհուրդ կու տան քաղաքի գլխաւոր փողոցներուն: Այս ծիրին մէջ ծնունդ առաւ Արցախեան ազատագրական պայքարին ընթացքին զոհուած մարտունեցիներու յուշարձանը, որուն հեղինակներն են Հայաստանի նկարիչներու միութեան անդամ, Արցախեան ազատամարտի մասնակից Արտիկ Քոչարեանը, Արամայիս Խլղաթեանը եւ Ռաֆիկ Սարգսեանը: Թէեւ սիմփոզիումը վերջ գտաւ Սեպտեմբերին, սակայն երեք քանդակագործները շարունակեցին յուշարձանի կերտումը՝ Նոյեմբերին աւարտելով զայն։
Բացման արարողութեան կը մասնակցէին Հայաստանի պաշտպանութեան նախարարութեան, Գեղարքունիքի մարզպետարանի, Երկրապահ կամաւորականներու միութեան (ԵԿՄ) ներկայացուցիչներ, Մարտունի քաղաքի եւ տարածաշրջանի համայնքներու մտաւորականներ, մանկավարժներ, զոհուած ազատամարտիկներու ընտանիքներու անդամներ, Հայրենական մեծ պատերազմի եւ Արցախեան ազատամարտի վեթերաններ, քանդակագործութեան սիմփոզիումը նախաձեռնող խումբի անդամներ, բարեգործներ եւ հովանաւորներ: Յուշարձանի բացումը կատարեց զոհուած ազատամարտիկ Արամ Խլոյեանի մայր Տատեանա Խլոյեանը եւ զոհուած ազատամարտիկ Գէիմ Գուլէյեանի հայր Ռաֆիկ Գուլէյեանը։ Այս առիթով խօսքեր արտասանեցին Գեղարքունիքի մարզպետի տեղակալ Անդրանիկ Յակոբեանը, Հայաստանի պետական պատկերասրահի Մարտունիի մասնաճիւղի տնօրէն, քանդակագործութեան սիմփոզիումի նախաձեռնող խումբի անդամ Անահիտ Գէորգեանը, զոհուած ազատամարտիկ Գագիկ Զաքարեանի այրի Անահիտ Զաքարեանը, Արցախեան ազատամարտին ընթացքին Մարտունիի վաշտի հրամանատար Թաթուլ Կարապետեանը: Մարտունիի քաղաքապետ Բագրատ Յարութիւնեան իր խօսքին մէջ դրուատեց Արամայիս Խլղաթեանին եւ անոր գործընկերներուն հայրենանուէր, դարերով ապրող ու ապրեցնող աշխատանքը եւ մասնաւորապէս Մարտունի քաղաքի բնակիչ Իշխան Գրիգորեանի բարերարութիւնը, որուն նուիրատուութեամբ կեանքի կոչուեցաւ այս յուշարձանը:
ԵԿՄ վարչութեան նախագահ Մանուէլ Գրիգորեանի անունով ԵԿՄ վարչութեան նախագահի տեղակալ Արա Կէտիկեանը սիմփոզիումի ծիրին մէջ քանդակներու կերտումը հովանաւորելուն համար ԵԿՄ մետալով պարգեւատրեց Գեղարքունիքի մարզպետ Ռաֆիկ Գրիգորեանը, բարերարներ Սեւակ Շահինեանը, Իշխան Գրիգորեանը, Աւետիք Նազարեանն ու Դաւիթ Երանոսեանը: Քանդակագործութեան սիմփոզիումի անդամներուն անունով բարերաներուն նուէրներ յանձնեց Արամայիս Խլղաթեանը:
«Արմէնփրէս»ին հետ ունեցած զրոյցին ընթացքին քանդակի գլխաւոր հեղինակ Արտիկ Քոչարեանը նշած է, որ յուշարձանը կը ներկայացնէ զոհուած ազատամարտիկը, որ կը համբառնայ երկինք՝ «Հազարան Բլբուլի թեւերի վրայ»: Ան իր կեանքը տուած է՝ աշխարհը ապրեցնելու եւ յաւերժացնելու համար: «Ես ոչ մի վայրկեան մարտում զոհուած իմ ընկերներին չեմ պատկերացնում մեռած, այլ՝ ապրող ու Հազարան Բլբուլի թեւերի վրայ անմահութեան հեռաստաններ գնացող», եզրափակած է Արտիկ Քոչարեանը:

LEAVE A REPLY

Please enter your comment!
Please enter your name here