Հայաստանի Քիւրտերը Կը Զօրակցին Թուրքիոյ Մէջ Հացադուլ Ընող Քիւրտերուն

0
128

«Էրտողանը ֆաշիստ է», «Կը բաւէ, կանխեցէ՛ք մահը», «Ազատութիւն քաղաքական բանտարկեալներուն եւ Օճալանին»: Այս կարգախօսներով բողոքի ցոյց կատարեցին Հայաստանի մէջ ապրող քրտական համայնքի ներկայացուցիչները: Հիմնականին մէջ կիներէ կազմուած ցուցարարները անցեալ Ուրբաթ օր, Երեւանի Շահումեանի հրապարակէն ուղղուեցան դէպի ՄԱԿի հայաստանեան գրասենեակ:
Քիւրտերը բազմիցս խօսած են այն մասին, թէ ի՛նչ վիճակ կը տիրէ 20 միլիոն հաշուող քրտական համայնք ունեցող Թուրքիոյ մէջ, սակայն բարձրաստիճան կառոյցներէն եւ համապատասխան մարմիններէն ո՛չ մէկ արձագանգ հնչած է:
Ցոյցին մասնակիցները հաստատած են, որ այլեւս պիտի չհանդուրժեն թրքական իշխանութիւններուն ոտնձգութիւնները քիւրտ ժողովուրդին դէմ: Բարեկեցիկ կեանքէն, քիւրտերու դէմ սահմանուած արգելքի վերացումէն բացի, անոնք նախ եւ առաջ կը պահանջեն ազատ արձակել Թուրքիոյ մէջ բանտարկուած իրենց առաջնորդ Օճալանն ու միւս քիւրտ քաղաքական բանտարկեալները։
«Քիւրտիստան կոմիտէ»ի նախագահ, քրտական համազգային կոնգրեսի պատգամաւոր Ժենեա Ամիրեան իր խօսքին մէջ ընդգծած է, որ հասած է ժամանակը տեղերը փոխելու՝ Էրտողանը բանտ դնելու եւ Ապտուլլահ Օճալանը դուրս բերելու բանտէն եւ քիւրտ ժողովուրդին ղեկավար նշանակելու։
Բայց եւ այնպէս թէ՛ անոնց, եւ թէ Թուրքիոյ մէջ հացադուլ կատարողներուն պահանջներու անարձագանգ մնացին, որովհետեւ քրտական համայնքին կացութիւնը չփոխուեցաւ։

LEAVE A REPLY

Please enter your comment!
Please enter your name here